პრეზიდენტის ადმინისტრაციის უფროსის განცხადებას პარლამენტის ადამიანის უფლებათა დაცვის კომიტეტის თავმჯდომარის პირველი მოადგილე ეხმაურება.

გიორგი აბაშიშვილის განცხადებაზე, რომ „ევროპული საქართველოსა“ და „ქართული ოცნების“ მონაწილეობით მიმდინარეობს ახალი საკონსტიტუციო უმრავლესობის ფორმირება, რომლის გამაერთიანებელი დღეს არის საქართველოს პრეზიდენტის წინააღმდეგ ბინძური კამპანიის წარმოება, გედევან ფოფხაძე ამბობს, რომ „ქართულ ოცნებასა” და „ევროპულ საქართველოს” შორის იმდენად განსხვავებული ღირებულებებია, პოლიტიკურ ძალებს შორის რაიმე გაერთიანება შეუძლებელია.

„პარლამენტში მსგავს ტენდენციებს ჯერ ვერ ვხედავ. პრეზიდენტის საწინააღმდეგო კამპანიას არავინ აწარმოებს. არ მგონია, რომ აქცენტი ამაზე ყოფილიყო. გუნდის შიგნით გარკვეული წესების ფორმირება ხდება. ყველაზე აქტუალურიც ესაა. „ქართულ ოცნებასა” და „ევროპულ საქართველოს” შორის იმდენად განსხვავებული ღირებულებითი ფასეულობებია, ასეთი ალიანსი ფაქტიურად შეუძლებელია”, განაცხადა ფოფხაძემ ჟურნალისტებთან საუბრისას.