რუსეთის საგარეო საქმეთა სამინისტროს ოფიციალურმა წარმომადგენელმა მარია ზახაროვამ ტელეარხ „Россия 24“-ის ეთერში იმის თაობაზე ისაუბრა, თუ რატომ იყენებს მისი აზრით, ამერიკის შეერთებული შტატები „დაუსრულებელ სანქციებს და დაშინებას“ რუსეთთან მიმართებაში.

მან ამგვარ პოლიტიკას „გეგმა ბ“ უწოდა, რომელზე დაყრდნობაც ვაშინგტონმა მას შემდეგ გადაწყვიტა, რაც მან ვერ გამონახა შესაძლებლობა შეენარჩუნებინა მოსკოვთან „დიპლომატიური თამაში“ და წარუმატებელი აღმოჩნდა თავისი მიზნების განხორციელებაში ახლო აღმოსავლეთსა და ჩრდილოეთ აფრიკაში.

ზახაროვას აზრით, შეერთებული შტატები ახლა „ყოველგვარი რეალობის გარეშე“ აწესებს ახალ სანქციებს რუსეთის მიმართ.

„თუკი ადრე გვეუბნებოდნენ, რომ ჩვენ უკრაინის გამო გვსჯიან, ახლა ფორმულირებები უბრალოდ კარდინალურად შეიცვალა. ჩვენ პრინციპში იმის გამო გვსჯიან, რაც ჩვენ საერთაშორისო არენაზე გაგვაჩნია. ეს კი ზუსტად ასეა ფორმულირებული მათი მხრიდან: რუსეთის საერთაშორისო საქმეებში როლის გამო. ეგ არის და ეგ“, განაცხადა ზახაროვამ.

ამერიკის შეერთებული შტატები სირიაში შექმნილი მდგომარეობიდან გამომდინარე მალე რუსეთის წინააღმდეგ ახალი სანქციების დაწესებაზე გააკეთებს განცხადებას, იტყობინება CBS News-ი გაერთიანებული ერების ორგანიზაციაში აშშ-ის ელჩზე, ნიკი ჰეილიზე დაყრდნობით.

„თქვენ დაინახავთ, რომ რუსული სანქციები გაძლიერდება. მინისტრი მნუჩინი (აშშ-ის ფინანსთა მინისტრი) ამის შესახებ ორშაბათს გამოაცხადებს, თუ მას ეს ჯერ არ გაუკეთებია, და ეს სანქციები პირდაპირ იქნება დაწესებული იმ კომპანიებზე, რომლებიც ასადს ქიმიური იარაღისთვის მოწყობილობებსა და ტექნოლოგიებს აწვდის“, განაცხადა ჰეილიმ კვირას.

დიპლომატის აღნიშნული განცხადებიდან მეორე დღეს თეთრმა სახლმა დაადასტურა, რომ ვაშინგტონი რუსეთს ახალ სანქციებს ახლო მომავალში დაუწესებს.