პარლამენტის იურიდიულ საკითხთა კომიტეტის თავმჯდომარის პირველი მოადგილე ვანო ზარდიაშვილი პრეზიდენტის მიერ 25 წლის ქალის მკვლელობაში ბრალდებული ვეფხია ბაქრაძის წარსულში შეწყალების საკითხს კიდევ ერთხელ ეხმაურება.

როგორც ზარდიაშვილი აცხადებს, „პრეზიდენტ მარგველაშვილის მიერ შეწყალებულთა სიას რომ გადავხედოთ, ჩვენ ვიხილავთ მკვლელებს, რომელიც პრეზიდენტმა მარგველაშვილმა შეიწყალა და შემდეგ მათ კიდევ მკვლელობა ჩაიდინეს, ჩვენ ვიხილავთ ნარკორეალიზატორებს, როდესაც პრეზიდენტმა შეიწყალა, მათ ორმაგი, სამმაგი ნარკოტიკი შემოიტანეს, პრეზიდენტმა მარგველაშვილმა შეიწყალა თავისი ცოლის ძმა, რომელსაც 17 წლიანი სასჯელი ჰქონდა და სამჯერ ნასამართლევი იყო".

საპარლამენტო უმრავლესობის წარმომადგენელი მიიჩნევს, რომ „პრეზიდენტ მარგველაშვილისნაირი შეცდომები ნებისმიერი ქვეყნის პრეზიდენტს რომ დაეშვა დემოკრატიულ სამყაროში, აუცილებლად, მას შეხსენებაც არ დასჭირდებოდა, ის თავისი ნებით საზოგადოებას ბოდიშს მოუხდიდა და გადადგებოდა".

ვანო ზარდიაშვილის განცხადებით, გიორგი მარგველაშვილის „უპასუხისმგებლო შეწყალებებმა" საზოგადოება, მმართველი გუნდი და ოპოზიციური სპექტრი გააერთიანა.

„აბაშიშვილისა და პრეზიდენტ მარგველაშვილის გუშინდელი განცხადებები იყო სავსებით უპასუხისმგებლო. არამც თუ ჩვენ ვერთიანდებით ოპოზიციასთან, მისმა საქციელმა, არაადეკვატურმა, უპასუხისმგებლო შეწყალებებმა მთლიანად საზოგადოება, როგორც ხელისუფლება, ასევე ოპოზიციური სპექტრი გააერთიანა და ყველა ერთხმად აღნიშნავს, რომ მისი საქციელები და შეწყალებები სავსებით უპასუხისმგებლოა", განაცხადა ვანო ზარდიაშვილმა.