„ავაკოვის გეგმაში“ დონბასის დაბრუნებაზე საუბრისას ყირიმის ხსენება უადგილოა, განაცხადა რუსეთის პრეზიდენტის პრეს-მდივანმა დიმიტრი პესკოვმა.

„ყირიმი - ეს რუსეთის რეგიონია. რუსეთის რეგიონების ბედი არ განიხილება არც ერთ სხვა სახელმწიფოსთან“, ხაზი გაუსვა პუტინის წარმომადგენელმა.

პესკოვმა აღნიშნა, რომ დონბასის პრობლემების მოწესრიგება მხოლოდ მინსკის შეთანხმებების შესრულებითაა შესაძლებელი, მაგრამ, როგორც კრემლის პრეს-მდივანი აცხადებს, კიევი მათ „სრულიად ბლოკავს“.

როგორია „ავაკოვის გეგმა“?

უკრაინის შინაგან საქმეთა მინისტრმა, არსენ ავაკოვმა სამშაბათს განაცხადა, რომ აშშ-ის სახელმწიფო მდივნის თანაშემწესთან, უეს მიტჩელთან დონბასის და ყირიმის უკრაინის კონტროლის ქვეშ მოქცევის ეტაპობრივი გეგმა განიხილა.

ავაკოვის აზრით, კიევმა უცილობლად, ნაბიჯ-ნაბიჯ უნდა დაიბრუნოს დონბასი. „ჩვენ მცირე ნაბიჯების ტაქტიკა გვესაჭიროება, რომელსაც ყველა ტაშს დაუკრავს“. მან აღნიშნა, რომ „დონბასის განთავისუფლება“ პოლიციური ოპერაცია იქნება, რომელშიც მშვიდობისმყოფელები იქნებიან ჩართული. ამასთან, ავაკოვმა ხაზი გაუსვა, რომ ძალოვანები ამზადებენ მოქმედების გეგმას მოვლენების ნებისმიერი სცენარის განვითარებისთვის.

თვითგამოცხადებულ დონეცკის სახალხო რესპუბლიკაში ავაკოვის გეგმას „რეგიონის „წმენდის“ „მორიგი მეთოდიკა“ უწოდეს.