ფრაქცია „ქართული ოცნების” თავმჯდომარის, მამუკა მდინარაძის განცხადებით, მმართველ გუნდს აქვს რესურსი, რომ გუნდის შიგნით „ყველაფერი დალაგდეს".

როგორც მდინარაძემ აღნიშნა, ყველა საკითხი უმრავლესობის შეხვედრაზე დარეგულირდება და საპარლამენტო უმრავლესობა ჩვეულ რიტმში გააგრძელებს მუშაობას.

„ნუ ელოდებით ჩემგან ან გუნდის დანარჩენი წევრებისგან საპასუხო განცხადებებს, როგორი კითხვაც არ უნდა დამისვათ, ჩემი პასუხი არის იგივე, რომ ნამდვილად არის გუნდში იმის რესურსი, რომ ჩვენ თამაშის საერთო წესებზე შევთანხმდეთ და გაცილებით მნიშვნელოვან თემებს მივაპყროთ ყურადღება. რაც შეეხება ცალკეულ გამონათქვამებს, ამაზე ვისმჯელებთ არამხოლოდ ხვალინდელ შეხვედრაზე, არამედ ამაზე კიდევ იქნება შეხვედრა. ჩვენ შევთანხმდებით თამაშის საერთო წესებზე და იქნება გუნდურობა. ყველაფერი დალაგდება და საპარლამენტო უმრავლესობა ჩვეულ რიტმში გააგრძელებს მუშაობას. მხარეები არ არსებობენ, აქ არის გუნდი", განაცხადა მამუკა მდინარაძემ.

შეკითხვაზე, ჩაერთვება თუ არა „ქართული ოცნების” საქმიანობაში ბიძინა ივანიშვილი, მამუკა მდინარაძე აცხადებს, რომ ხვალ დაგეგმილ შეხვედრაზე აღნიშნული საკითხი არ განიხილება.

„მე დავეთანხმები ნებისმიერ ადამიანს, რომელიც იტყვის, რომ პარტიულ საქმიანობაში ჩართული იყოს ბიძინა ივანიშვილი, თუმცა დღეის მოცემულობით ხვალინდელ სხდომაზე ეს საკითხი არ დგას", აღნიშნა მდინარაძემ.