ეროვნულ სასწავლო ცენტრ „კრწანისში“ საერთო საჯარისო ცენტრის მანევრის სკოლის ქვეით უმცროს ოფიცერთა და საბრძოლო სკოლის სამხედრო საინჟინრო უმცროს ოფიცერთა მომზადების კურსების გამოშვების ცერემონიალი გაიმართა.

კურსდამთავრებულებს სიტყვით წვრთნებისა და სამხედრო განათლების სარდალმა, პოლკოვნიკმა მალხაზ მაკარაძემ მიმართა და სწავლების დასრულება მიულოცა. მან სამომავლო რეფორმებზე ისაუბრა და უმცროს ოფიცრებს წარმატებული კარიერა უსურვა.

ღონისძიების დასასრულს, სამხედრო მოსამსახურეებს დიპლომები საზეიმო ვითარებაში განათლების სარდალმა, პოლკოვნიკ მალხაზ მაკარაძემ, საერთო საჯარისო ცენტრის მეთაურმა იროდი ქადაგიშვილმა და ცენტრ „კრწანისის“ მეთაურმა ლევან მურჯიკნელმა გადასცეს.

მანევრის სკოლის ქვეით უმცროს ოფიცერთა მომზადების კურსი 23-მა სამხედრო მოსამსახურემ გაიარა. 7 თვის განმავლობაში მათ როგორც საერთო-საჯარისო ტაქტიკა, სახმელეთო ნავიგაცია, ასევე ბრძოლის მხარდამჭერი და უზრუნველყოფის ელემენტების საფუძვლები შეისწავლეს. აღნიშნული კურსის გავლის შემდეგ, მათ მიენიჭათ ძირითადი სამხედრო განათლების I საფეხურის მქონე ოფიცრის კვალიფიკაცია მსუბუქი ქვეითის სპეციალობით.

საბრძოლო სკოლის სამხედრო საინჟინრო უმცროს ოფიცერთა მომზადების კურსი კი, 10-მა სამხედრო მოსამსახურემ დაამთავრა. ოფიცრებმა შეისწავლეს საერთო საჯარისო მომზადება, საინჟინრო ოპერაციები, საინჟინრო კონსტრუქციები, მათი სტრუქტურა და საინჟინრო ტაქტიკა.

კურსდამთავრებულები საკუთარ ქვედანაყოფებში გადანაწილდებიან და მსახურს შეიარაღებულ ძალებში განაგრძობენ.

ინფორმაციას თავდაცვის უწყების პრესსამსახური ავრცელებს.