ვისაც ეწყინაო, ცივი წყალი დალიოსო - ნათქვამია და ჯერ არ ცხელა ისე, რომ ცივი წყალი დავლიო, აღნიშნული განცხადება საპარლამენტო უმრავლესობის წევრმა, დავით ჭიჭინაძემ უმრავლესობის ლიდერთან, არჩილ თალაკვაძესთან გამართული შეხვედრის შემდეგ გააკეთა.

როგორც ჭიჭინაძემ აღნიშნა, მასსა და უმრავლესობის ლიდერს შორის შეკითხვები ამოწურულია და შესაბამისად, დაპირისპირება, რომელიც არსებობდა უკვე განვლილი ეტაპია.

„ჩვენ გავიარეთ ეს, ასე ვთქვათ, ისტორიას ჩავაბარეთ და უკან მიბრუნება არ ღირს. დანარჩენი ქრონოლოგიურად რა როგორ ხდებოდა, ეს თქვენ უფრო შეგიძლიათ, რადგან ყველას გაქვთ არქივში. ნუ ეძებთ სხვა დინებებს, რაც იყო, ყველაფერი ზემოთ დევს.... პასუხები მიცემული მაქვს", განუცხადა ჭიჭინაძემ „რუსთავი 2"-ს და დასძინა: „ცალ-ცალკე ვერ გავაკეთებთ კომენტარებს. თუ არჩილს ექნება სურვილი ჩვენი შეთანხმების დარღვევის, შევთანხმდებით - ერთად დავარღვევთ, ერთად მოგცემთ კომენტარს".

დეპუტატი აცხადებს, რომ არ შეუცვლია შეხედულებები და თუ იქნება ისევ მიუღებელი პირობები, იგი სათანადო შეფასებებს გააკეთებს.

„მე არ ვიძახი, რომ შევიცვალე პოზიცია. მე ყოველთვის ვცემდი პასუხს. თუ არ არის დასმული ისეთი კითხვები და ისეთი პრინციპები, რომლებიც ჩემთის მიუღებელია, კომენტარი რაზე ვაკეთო. აქამდე ვცხოვრობდით უკომენტაროდ და გავაგრძელებთ. მაგრამ თუ იქნება მიუღებელი პირობები, არასოდეს არ მოვრიდებივარ და არც ამჯერად არ მოვერიდები რომ გავაკეთო შესაბამისი შეფასება.... ნაწყენობა როგორ შეიძლება?! ვისაც ეწყინაო, ცივი წყალი დალიოსო - ნათქვამია და ჯერ არ ცხელა ისე, რომ ცივი წყალი დავლიო", განაცხადა დავით ჭიჭინაძემ.