ჩრდილოეთ კორეის ლიდერმა კიმ ჩენ ინმა „უკიდურესად ღრმა მწუხარება“ გამოხატა ავტობუსის ინციდენტის გამო, რის შედეგადაც 32 ჩინელი ტურისტი და 4 ჩრდილოკორეელი გარდაიცვალა.

ინციდენტი კვირას, ღამით, ჩრდილოეთ კორეის ჰვანგჰაეს პროვინციაში მოხდა. ტურისტული ავტობუსი ხიდიდან გადავარდა.

როგორც BBC იუწყება, იშვიათი შემთხვევაა, როცა ჩრდილოეთ კორეის მკაცრად კონტროლირებადი მედია ნეგატიურ ახალ ამბავს ავრცელებს, და კიდევ უფრო უჩვეულოა კიმის მხრიდან თავად ინციდენტის აღიარება.

„კიმმა განაცხადა, რომ მოულოდნელმა ინციდენტმა მას გული ძლიერ დაუმძიმა და უდიდესი სევდა მოჰგვარა“, იტყობინება ოფიციალური სააგენტო KCNA.

ჩრდილოკორეულმა მედიამ კიმ ჩენ ინის საავადმყოფოში ვიზიტის ამსახველი ფოტო გაავრცელა, სადაც ქვეყნის უზენაესი ლიდერი ტრავმამიღებულ მგზავრებს ესაუბრება.

კიმი ასევე ფხენიანში ჩინეთის საელჩოს ესტუმრა და ჩრდილოეთ კორეაში ჩინეთის ელჩს, ლი ძინძუნს შეხვდა და „თავისი ღრმა და გულწრფელი სამძიმარი და თანაგრძნობა გამოხატა“.

კომუნისტური ჩინეთი და ჩრდილოეთ კორეა დიდი ხნის პოლიტიკური მოკავშირეები და უდიდესი სავაჭრო პარტნიორები არიან. როგორც BBC წერს, კიმის საავადმყოფოში ტრავმირებულ მგზავრებთან მოსანახულებლად დაუყოვნებლივ მისვლა, უფრო ჩინეთის მოსახლეობაში მისი იმიჯის დაცვას შეიძლება ემსახურებოდეს.