რუსეთი ახლო მომავალში სირიის რეჟიმს ახალი თავდაცვის სისტემით უზრუნველყოფს, იტყობინება „რია ნოვოსტი“ რუსეთის თავდაცვის სამინისტროზე დაყრდნობით.

გავრცელებულ ინფორმაციაში არ არის აღნიშნული თუ რა სახის სისტემებს მიაწვდის მოსკოვი თავის ახლო მოკავშირეს.

ორშაბათს, რუსეთის ყოველდღიურმა გამოცემამ, „კომერსანტმა“ გაავრცელა ინფორმაცია, რომ მოსკოვი ბაშარ ალ-ასადის რეჟიმისთვის S-300 სარაკეტო თავდაცვის სისტემის გადაცემას აპირებს, იმის მიუხედავად, რომ ამის წინააღმდეგი ისრაელია. ისრაელის თავდაცვის მინისტრმა ავიგდორ ლიბერმანმა აღნიშნული ინფორმაციის გავრცელების შემდეგ განაცხადა, რომ თუკი მძლავრი S-300 ისრაელის წინააღმდეგ იქნება გამოყენებული, სისტემა განადგურებული იქნება.

მოგვიანებით, რუსეთის საგარეო საქმეთა სამინისტრომ ნაწილობრივ უარყო გაზეთის ცნობა, განაცხადა რა, რომ S-300-ის სირიისთვის გადაცემის გადაწყვეტილება ჯერ მიღებული არ არის.

რუსულმა სამხედრო წყაროებმა „კომერსანტს“ უთხრეს, რომ თუკი ისრაელი შეეცდება ანტი-სარაკეტო ბატარეის განადგურებას, ეს „კატასტროფული იქნება ყველა მხარისათვის“.