„ტელეიმედის“ დარბევის ფაქტზე სოდის ყოფილი დირექტორის, ერეკლე კოდუას პასუხისგებაში მიცემას ეხმაურება „რუსთავი 2“-ის გენერალური დირექტორი ნიკა გვარამია, რომელიც ირწმუნება, რომ ბიძინა ივანიშვილი მოითხოვდა ბადრი პატარკაციშვილის „ლამის დახვრეტას და „იმედის“ მიწასთან მოსწორებას“ და ივანიშვილი სწორედ კოდუას უნდა უმადლოდეს, რომ ცოცხალია და „ხეზე ჩამომხრჩვალი არ კონწიალობს“.

„ერეკლე კოდუამ ქვეყანას სახელმწიფო გადატრიალება აარიდა. აი ასე, მარტო მტრის ბუნაგში შევიდა და უტყუარი მტკიცებულებები გამოიტანა. სიცოცხლის რისკის ფასად. არ იზამდა და იქნებოდა დღეს ბადროკრატია საქართველოში. და გამოიცანით პირველივე ხეზე ვის ჩამოახრჩობდა პატარკაციშვილი - ბიძინა ივანიშვილს! და ეს მშვენივრად იცოდა ივანიშვილმა და ყოველდღიურ რეჟიმში მოითხოვდა ბადრის ლამის დახვრეტას და იმედის მიწასთან მოსწორებას (იმედია, არ იკითხავთ, მე საიდან ვიცი). ასე რომ, კოდუას უნდა უმადლოდეს ბიძინა, რომ ცოცხალია და დღეს ხეებს ეზოში რგავს და არა ზედ ჩამომხრჩვალი კონწიალობს“, წერს გვარამია სოციალურ ქსელში.