საქართველოს ხელისუფლება ქვეყნიდან შენგენის ზონაში გასვლაზე შეზღუდვებს აწესებს. როგორც სამაუწყებლო კომპანია „რუსთავი 2“ იტყობინება, დოკუმენტის მიხედვით, ქართველ მესაზღვრეს უფლება ექნება, მოქალაქე ევროკავშირის ზონაში არ შეუშვას. კანონით განისაზღვრება იმ დოკუმენტების ჩამონათვალი, რომელიც მგზავრს საზღვრის კვეთის დროს თან უნდა ჰქონდეს და იმ შემთხვევაში თუ დოკუმენტაციაში მესაზღვრე ხარვეზს იპოვის, მოქალაქეს ქვეყნის დატოვების უფლებას არ მისცემს. ოპოზიციაში შიშობენ, რომ კანონს მმართველ პარტია პოლიტიკური ნიშნით გამოიყენებს.

ამ ინიციატივისა გარდა, პარლამენტის კანცელარიაში უკვე დარეგისტრირდა უმრავლესობის 8 დეპუტატის ხელმოწერით მეორე საკანონმდებლო ინიციატივაც. პროექტის მიხედვით, სისხლის სამართლის კოდექსს ახალი სპეციალური მუხლი ემატება, რომლის თანახმადაც, საქართველოს მოქალაქეს 3-დან 6-წლამდე პატიმრობა ემუქრება, თუ ის მოქალაქეს უცხო ქვეყნის საზღვარზე უკანონოდ გადაიყვანს ან უცხო ქვეყანაში უკანონოდ ყოფნისას დახმარებას გაუწევს.

კანონპროექტს საფრთხის შემცველად მიიჩნევენ ოპოზიციის და არასამთავრობო ორგანიზაციების წარმომადგენლები, რომლებსაც მიაჩნიათ, რომ ეს შესაძლოა ხელისუფლების ხელში მოქალაქეთა პოლიტიკური ნიშნით დევნის იარაღად იქცეს. მმართველი პარტია კი კანონპროექტის შექმნის საჭიროებას ვიზალიბერალიზაციის პროცესს უკავშირებს.

პარლამენტში საკომიტეტო განხილვები უახლოეს პერიოდში დაიწყება. მმართველი გუნდის კანონპროექტს ბიუროს სხდომა უკვე დარეგისტრირდა.