„ქართული ოცნების“ ყოფილი მოკავშირე, პარლამენტის ყოფილი თავმჯდომარე დავით უსუფაშვილი საქართველოს ყოფილი პრემიერ მინისტრის, ბიძინა ივანიშვილის პოლიტიკაში დაბრუნებას აფასებს და აცხადებს, რომ ამგვარი ნაბიჯის გადადგმა დადასტურებაა იმისა, რომ მთავრობა და საკონსტიტუციო უმრავლესობით მოსული პარლამენტი ქვეყანას ვერ მართავს.

„ბიძინა ივანიშვილმა, როგორც ჩანს, გაისიგრძეგანა ის რეალობა, რომ ქართული ოცნება პოლიტიკური კრახის პირასაა და გადაწყვიტა გადაედგა ის ბოლო ნაბიჯი, რაც მას შეეძლო გადაედგა, რასაც თავის დროზე ‘მეორედ მოსვლას’ უწოდებდა თავად. ბიძინა ივანიშვილის დაბრუნება ნიშნავს იმას, რომ ვინც დღემდე უძღვებოდა ქვეყანას, მთავრობას, პარლამენტს, სხვა სახელმწიფო-პოლიტიკურ თანამდებობებს, მათ ვერ შეძლეს საქმის კეთება. ეს არის უნიკალური შემთხვევა მსოფლიო პოლიტიკის ისტორიაში, როდესაც საკონსტიტუციო უმრავლესობით გამარჯვებული პოლიტიკური ძალა ერთ წელიწადში ამ ზომამდე მიდის, რომ სთხოვს თავის დამფუძნებელს, მოდი, გვიშველე, თორემ ჩამოგვექცა თავზე ყველაფერიო“, განაცხადა დავით უსუფაშვილმა.