საქართველოს პარლამენტის თავმჯდომარის მოადგილე ფრაქცია „ქართული ოცნება - კონსერვატორების“ წევრი ზვიად ძიძიგური პოლიტიკაში ბიძინა ივანიშვილის დაბრუნებას იწონებს და აცხადებს, რომ ყოფილი პრემიერ მინისტრის ეს ნაბიჯი ქვეყანას პოზიტიურად წაადგება.

„ძალიან ნასიამოვნები ვარ იმ გადაწყვეტილებით, რომელიც ბატონმა ბიძინამ მიიღო და ვფიქრობ, რომ ეს წაადგება ქვეყანას ძალიან კარგად, პოზიტიურად იმიტომ, რომ ასეთი გამჭრიახი და გონიერი კაცის პოლიტიკურ ცხოვრებაში აქტიური მონაწილეობა, როგორიც ბიძინა ივანიშვილია, ვფიქრობ, რომ პოზიტიური იქნება მხოლოდ ჩემი ქვეყნისთვის", განაცხადა ზვიად ძიძიგურმა, რომლის აზრითაც, ის, რომ ივანიშვილი პოლიტიკიდან წასვლის შემდეგ, პოლიტიკაში დაბრუნებას აღარ აპირებდა, ნიშნავს იმას, რომ „ბიძინა ივანიშვილმაც კი არასოდეს არ უნდა თქვას არასოდეს".

„რაც შეეხება მეორედ მოსვლას და ა.შ. საკითხს, რომ ბიძინა ივანიშვილი არ განიხილავდა და წასვლის დროს არ აპირებდა, დავუშვათ, უკან დაბრუნებას, ეს კიდევ ერთხელ ადასტურებს უდაო ჭეშმარიტებას, რომ ბიძინა ივანიშვილმაც კი, არასოდეს არ უნდა თქვას არასოდეს, იმიტომ, რომ პოლიტიკაში არასოდეს თქმა ეს არის პირობითი ნათქვამი და არა ფუნდამენტური. ფეხბურთის გუნდს, რაც არ უნდა წარმატებული იყოს, ყოველთვის სჭირდება განახლება, სჭირდება ახალი სახეებიც და ძველი გამოცდილებაც და ოპტიმალურად უნდა იყოს ეს შეზავებული და დარწმუნებული ვარ, ასეთ გადაწყვეტილებას მიიღებს „ქართული ოცნება“, განაცხადა ზვიად ძიძიგურმა.