დუშეთის მუნიციპალიტეტის მერიისა და საკრებულოს ორგანიზებით, ჯუთა-როშკის გზის მშენებლობის პროექტის საჯარო განხილვა გაიმართა. შეხვედრის ინიციატორი სოფლების- როშკის, ღელისვაკის, ბლოსა და ბარისახოს მოსახლეობა იყო, რომელთაც აღნიშნული თხოვნით ადგილობრივ ხელისუფლებას მიმართეს.

საჯარო განხილვაზე, დაინტერესებული მოსახლეობა დეტალურად გაეცნო ახალი საავტომობილო გზის პროექტს. დამსწრე საზოგადოებას საშუალება ჰქონდა ინფორმაცია უშუალოდ პროექტანტი კომპანიის - „IGH Georgia’’-ს წარმომადგენლებისაგან მიეღო.

კომპანიამ წარმოადგინა პროექტის განახლებული ვერსია, რომელშიც მაქსიმალურადაა გათვალისწინებული ადგილობრივი მოსახლეობის მოსაზრებები.

პროექტის მიხედვით, საავტომობილო გზა სამხრეთ-აღმოსავლეთ ფერდობსა და ქედზე გაივლის, რომელიც აბსოლუტურად უწყლოა, მზიანი და ავტომანქანით გადაადგილება შესაძლებელია ზამთრის პერიოდშიც.

შეხვედრას მოსახლეობასთან ერთად, ესწრებოდნენ დუშთის მუნიციპალიტეტის მერი ზურაბ სეხნიაშვილი და საკრებულოს თავმჯდომარის მოადგილე კახაბერ ჩიტაური, აგრეთვე მერიისა და საკრებულოს თანამშრომლები. ადგილობრივი ხელისუფლების წარმომადგენლებმა მოსახლეობის მოსაზრებები მოისმინეს და დარწმუნდნენ, რომ პროექტი მათთვის აბსოლუტურად მისაღებია.

ჯუთა–როშკის საავტომობილო გზის მშენებლობა ყაზბეგი–ხევსურეთი–თუშეთის შემაერთებელი გზის პროექტის ნაწილია, რომელსაც საავტომობილო გზების დეპარტამენტი ახორციელებს. დეპარტამენტის წარმომადგენლების ინფორმაციით, ახალი საავტომობილო გზის მშენებლობა 2020 წლამდე უნდა დასრულდეს.

ინფორმაციას დუშეთის მერიის პრესსამსახური ავრცელებს.