ვანისა და ხონის მაჟორიტარულ საარჩევნო ოლქში „ქართული ოცნების“ გამარჯვებულმა კანდიდატმა, გივი ჭიჭინაძემ განაცხადა, რომ პარლამენტის წევრობა „ძალიან დიდი პასუხისმგებლობაა“.

„ვიცი, რომ რაღაც ძალიან დიდი პასუხისმგებლობა ავიღე ჩემს თავზე, რომ ხონის და ვანის წარმომადგენელი ვიყო ჩვენი ქვეყნის პარლამენტში და დიდი მადლობა პირველ რიგში ყველა ამომრჩეველს, ვინც ჩვენს სასარგებლოდ გააკეთა არჩევანი“, განაცხადა გივი ჭიჭინაძემ და დაამატა:

„ძალზე მშვიდ გარემოში ჩაიარა წინასაარჩევნო პერიოდმაც და არჩევნებმაც და მე მგონი არანაირ ექსცესს ადგილი არ ჰქონია“.

№54-ე მაჟორიტარულ საარჩევნო ოლქში გამართული საქართველოს პარლამენტის შუალედური არჩევნების წინასწარი შედეგები 60-ვე უბნის მიხედვით, 6 რეგისტრირებულ კანდიდატს შორის შემდეგნაირად გადანაწილდა:

№2 გიორგი უგულავა - 10 404 (38.38%)

№17 გიორგი ლილუაშვილი - 124 (0.46%)

№21 ზურაბ ქართველიშვილი - 59 (0.22%)

№23 მამუკა ტუსკაძე 399 - (1.47%)

№41 გივი ჭიჭინაძე 15 684 - (57.86%)

№42 ვასილ კოპალიანი 436 - (1.61%)

ხონისა და ვანის გაერთიანებულ №54 მაჟორიტარულ საარჩევნო ოლქში შუალედური არჩევნები მას შემდეგ დაინიშნა, რაც ამ ოლქიდან 2016 წელს არჩეულმა დეპუტატმა მმართველი პარტიიდან გრიგოლ ლილუაშვილმა სახელმწიფო უსაფრთხოების სამსახურის უფროსის მოადგილის პოსტზე გადანაცვლების გამო გასულ წელს პარლამენტის წევრის მანდატი დატოვა.