თბილსის მეტროპოლიტენი მემანქანეების გაფიცვის გამო ხუთშაბათს, 3 მაისს არ იმუშავებს. ამის შესახებ განცხადება მემანქანეთა პროფკავშირების „ერთობა 2013“ -ის თავმჯდომარემ, რატი კაპანაძემ მეტროსადგურ „რუსთაველთან“ დღეს გამართულ ბრიფინგზე გააკეთა.

აპრილის დასაწყისში მეტროპოლიტენის თანამშრომელთა ნაწილმა გამაფრთხილებელი აქცია გამართა. ისინი გაფიცვის მოწყობით და მეტროს პარალიზებით დაიმუქრნენ, თუკი მათი ხელფასები არ მოიმატებდა. ამჟამად მემანქანეთა საათობრივი ანაზღაურება 7 ლარს შეადგენს, ისინი კი ამ თანხის 10 ლარამდე გაზრდას ითხოვენ.

„სამწუხაროდ, მოლაპარაკებებმა შედეგი არ მოგვცა... მერია და ‘თბილისის სატრანსპორტო კომპანია’ აცხადებენ, რომ დღეს არ არსებობს რესურსი. ჩვენ იძულებული ვართ გამოვიყენოთ შრომითი ხელშეკრულების პირობები და ხუთშაბათს გავაჩეროთ მეტროპოლიტენის მუშაობა“, განაცხადა კაპანაძემ ბრიფინგზე.

„ერთობა 2013“-ის ცნობით, გაფიცვას 240-ამდე მემანქანე შეუერთდება. მეტროპლიტენის თანამშრომლები ირწმუნებიან, რომ მათი ხელფასი 2013 წლის შემდეგ არ მომატებულა.

სადღეისოდ, მემანქანის საშუალო ხელფასი 1 200 ლარია.

თბილისის მეტროპოლიტენის თანამშრომლების შესაძლო გაფიცვასთან დაკავშირებულ ინფორმაციას დღეს დედაქალაქის მერი კახა კალაძე გამოეხმაურა და აღნიშნა, რომ „არსებული ეკონომიკური მდგომარეობიდან გამომდინარე რაიმე თანხების მატებაზე საუბარი შეუძლებელია".

მანვე განაცხადა, რომ მეტროს პარალიზება არ მოხდება.

„ჩვენ ყველაფერს გავაკეთებთ იმისთვის, რომ მეტროს გაჩერება არ მოხდეს", განუცხადა მერმა ჟურნალისტებს.