„ქართული ოცნების“ პოლიტსაბჭოს სავარაუდოდ, დავით საგანელიძე დატოვებს. პარტიის ცენტრალურ ოფისში მისულმა საგანელიძემ ჟურნალისტებთან განაცხადა, რომ ბოლო წლებში მისი პოლიტსაბჭოს წევრობა ფორმალური იყო და მიზანშეწონილია „გადახალისება“ და „ახალი სახეების“ ჩართულობა პოლიტიკურ საქმიანობაში.
 

„ნამდვილად არ არის კონკრეტულად გადაწყვეტილი, რამდენი პოლიტსაბჭოს წევრი იქნება ახალ შემადგენლობაში. ნამდვილად სწორია, რომ მოხდეს გადახალისება - ახალი პოლიტსაბჭო, ახალი ენერგიით, ახალი სახეებიც აუცილებელია ბუნებრივია, პოლიტიკაში, ასე რომ შევხედოთ“, აღნიშნა საგანელიძემ და ჟურნალისტის შეკითხვაზე, დარჩება თუ არა თავად ახალ შემადგენლობაში, ასე უპასუხა:

„მე ჩემი პოზიცია გამაჩნია და ჩემი პოზიცია ის არის, რომ ორ წელიწადზე მეტია ფაქტიურად პოლიტიკაში არა ვარ. ფორმალურად პოლიტსაბჭოში ორ წელიწადნახევარი ყოფნა არ ნიშნავს პოლიტიკაში ყოფნას იმიტომ, რომ მე მინდა განვაცხადო, რომ ამ პერიოდის განმავლობაში რაც მე ფონდს ვხელმძღვანელობ, არც ერთი პოლიტიკური გადაწყვეტილება მე პირადად არ მიმიღია და არც იქნებოდა სწორი“.