საქართველოს იუსტიციის მინისტრს, თეა წულუკიანს პრეზიდენტის შეწყალების კრიტერიუმებთან დაკავშირებით კითხვის ნიშნები აქვს. ამის შესახებ მინისტრმა მთავრობის სხდომის შემდეგ გამართულ ბრიფინგზე ისაუბრა.

როგორც თეა წულუკიანმა აღნიშნა, პრეზიდენტმა შეწყალების წესში, რამდენიმე კვირის წინ განახორციელა ცვლილებები, რომლის მიხედვითაც, გაადვილა იმ პირების შეწყალება, რომლებიც სხვადასხვა კორუფციულ დანაშაულთან შემხებლობაში არიან და იხდიან სხვადასხვა დანაშაულზე სასჯელს.

„პრეზიდენტმა გუშინ თავისი საპარლამენტო დღე როგორც დაიწყო ცუდად, ისე დაამთავრა ცუდად. ჰქონდა შესაძლელობა, რომ მოესმინა ყველა შეკითხვა მწვავე კრიტიკის კონტექსტში დასმული და ბოლოს, ბოლო სიტყვის სახით ყველა კითხვისთვის გაეცა პასუხი.

მე ვიცი ერთი რამ, რომ საქართველს პრეზიდენტმა შეწყალების წესში რამდენიმე კვირის წინ განახორციელა ცვლილებები, რომლის თანახმადაც მან გააადვილა იმ პირების შეწყალება, რომლებიც სხვადასხვა კორუფციულ დანაშაულთან შემხებლობაში არიან და იხდიან სხვადასხვა დანაშაულზე სასჯელს.

როგორც ამ ქვეყნის მოქალაქეს, როგორც რიგით მინისტრს, მაქვს კითხვები, რა კრიტერიუმებით იწყალებს ის სხვადასხვა დამნაშავეს", განაცხადა წულუკიანმა, რომლის თქმითაც, თუკი არსებობს რაიმე კონკრეტული ფაქტები, ამის შესწავლა უნდა მოხდეს.

შეწყალების საკითხზე ისაუბრა გუშინ საქართველოს პარლამენტის თავმჯდომარემ პლენარულ სესიაზე, სადაც მანამდე პრეზიდენტმა ყოვეწლიური ანგარიში წარადგინა. ირაკლი კობახიძე აცხადებს, რომ უფლებამოსილება ბოროტად არის გამოყენებული.