მარტში რუსეთის პრეზიდენტად მეოთხე ვადით არჩეული 65 წლის ვლადიმერ პუტინი, რომელიც ძალაუფლებაში 18 წლის განმავლობაში ხან პრეზიდენტის, ხან კი პრემიერ მინისტრის პოსტზე იმყოფება, ორშაბათს ფიცს დადებს.

ინაუგურაციის გამართვამდე ორი დღით ადრე, შაბათს, პუტინის წინააღმდეგ მოსკოვსა და ქვეყნის სხვა ქალაქებში გამოსული პროტესტანტები პოლიციამ დაშალა, ოპოზიციის მთავარი ლიდერი ალექსეი ნავალნი კი დააკავა.

როგორც ახალი ამბების სააგენტო AFP იტყობინება, მოსკოვში პუტინის ახლანდელი ინაუგურაცია 2012 წელთან შედარებით მოსალოდნელია, რომ უფრო ნაკლებად პომპეზური იყოს.

ვლადიმერ პუტინი რუსეთს მომდევნო ექვსი წლის განმავლობაშიც უხელმძღვანელებს, რადგან მან 18 მარტის საპრეზიდენტო არჩევნებში აბსოლუტური უმრავლესობით გაიმარჯვა.

პუტინს ნდობა რუსეთის ამომრჩეველთა 76-ზე მეტმა პროცენტმა გამოუცხადა. რუსეთის ცენტრალური საარჩევნო კომისიის ცნობით, მას ხმა 54,5 მილიონმა მოქალაქემ მისცა, 5,1 მილიონით მეტმა, ვიდრე 2004 წელს. 

პირველადი მონაცემების გამოქვეყნების შემდეგ, მოსკოვში მომიტინგეებისადმი მიმართვისას პუტინმა განაცხადა, რომ ამომრჩევლებმა „აღიარეს ბოლო ხუთი წლის მიღწევები“.

ჟურნალისტებთან საუბრისას, მან სიცილი დაიწყო მისადმი დასმული შეკითხვის შემდეგ, იყრიდა თუ არა კიდევ კენჭს 2024 წლის საპრეზიდენტო არჩევნებში.

„რასაც თქვენ ამბობთ, ცოტა მხიარულ ნოტაზე დამყენებელია. როგორ ფიქრობთ, მე აქ 100 წლამდე ვიქნები? არა!“, თქვა პუტინმა.

მეორე ადგილზე კომუნისტური პარტიის კანდიდატი პაველ გრუდინი გავიდა. მან ხმების 12% მიიღო.

ვეტერანმა ნაციონალისტმა, ვლადიმერ ჟირინოვსკიმ ხმების 6%-ზე ნაკლები, ტელეწამყვანმა ქსენია სობჩაკმა კი 2%-ზე ნაკლები მიიღო.

ქვეყნის უმაღლესი ხელმძღვანელის პოსტის დასაკავებლად 8 კანდიდატი იბრძოდა: სერგეი ბაბურინი, პაველ გრუდინინი, ვლადიმერ ჟირინოვსკი, ვლადიმერ პუტინი, ქსენია სობჩაკი, მაქსიმ სურაიკინი, ბორის ტიტოვი და გრიგორი იავლინსკი.

პუტინის ერთ-ერთ მთავარ მოწინააღმდეგეს, ალექსეი ნავალნის კენჭისყრაში მონაწილეობაზე უარი ეთქვა.