გერმანიის ფედერაციული რესპუბლიკის მინისტრთა კაბინეტმა დაადასტურა ინფორმაცია იმის შესახებ, რომ კანცლერი ანგელა მერკელი 18 მაისს სოჭს ესტუმრება. ინფორმაციას „რია ნოვოსტი“ გერმანიის მთავრობის პრეს-სამსახურზე დაყრდნობით ავრცელებს.

„სამთავრობო ბრიფინგზე, ფედერალური ხელისუფლების ოფიციალურმა წარმომადგენელმა, ულრიკ დემერმა სულ ახლახან დაადასტურა, რომ სოჭში მერკელის ვიზიტი 18 მაისს შედგება. დანარჩენი ინფორმაცია ჩვენი მხრიდან მოგვიანებით იქნება გავრცელებული“, ნათქვამია შეტყობინებაში, რომელიც „რია ნოვოსტიმ“ გერმანიის მთავრობისაგან, გაგზავნილი შეკითხვის პასუხად მიიღო.

დემერმა ასევე აღნიშნა, რომ „კონფლიქტების“ მიუხედავად, გერმანიის კანცლერი მხარს უჭერს რუსეთის პრეზიდენტთან, ვლადიმერ პუტინთან მუდმივ კონტაქტს.

უფრო ადრე, რუსეთის პრეზიდენტის თანაშემწემ, იური უშაკოვმა ჟურნალისტებს განუცხადა, რომ ანგელა მერკელი 18 მაისს სოჭს ეწვევა და მოლაპარაკებებს გამართავს ვლადიმერ პუტინთან.