უკრაინის პრეზიდენტის პრესსამსახურის ინფორმაციით, უკრაინის პრეზიდენტის სასახლეში პეტრო პოროშენკოსა და ოდესის გუბერნატორის, მიხეილ სააკაშვილის შეხვედრა გაიმართა, სადაც სააკაშვილმა პოროშენკოს ოდესაში გამართული შეხვედრების შესახებ უამბო და საკუთარი რეფორმების გეგმები გააცნო.


რუსთავი 2-ის ცნობით, სააკაშვილმა განაცხადა, რომ კორუფციის წინააღმდეგ ნულოვანი ტოლერანტობის პრინციპი ამოქმედდება და ეს სწორედ ის სტრატეგიაა, რასაც ოდესის მოსახლეობა ელოდა.


„დადებითად ვაფასებ იმ გზავნილებს, რაც თქვენ გამოსვლის დროს გააჟღერეთ, კორუფციის წინააღმდეგ ნულოვანი ტოლერანტობა - ეს არის ის გზავნილი, რისი გაგონებაც ოდესის მცხოვრებლებს სურდათ. ისინი მოელიან, რომ თქვენი მესიჯები ხელისუფლების ყველა დონეზე განხორციელება“, - განაცხადა მიხეილ სააკაშვილმა.


უკრაინის პრეზიდენტმა კი მიხეილ სააკაშვილს განუცხადა, რომ სააკაშვილის დანიშვნას გუბერნატორის პოსტზე, უკრაინელები იმედითა და ოპტიმიზმით შეხვდნენ.


„ხალხს კონკრეტულ და პრაქტიკულ შედეგებზე, რომელიც მუშაობის შედეგად უახლოეს მომავალში უნდა გვქონდეს, დიდი მოლოდინი აქვს. პირველ რიგში ეს კორუფციის წინააღმდეგ ბრძოლას და წესრიგის დამყარებას უკავშირდება“, - განაცხადა პეტრო პოროშენკომ.


უკრაინის პრეზიდენტის პრესსამსახურის ინფორმაციით, პეტრო პოროშენკომ დადებითი შეფასება მისცა გუბერნატორ სააკაშვილის ინიციატივას, თანამშრომელთა და რაიონის ხელმძღვანელთა კონკურსის წესით აყვანის შესახებ.


„მე თქვენი პოზიცია ადმინისტრაციის თანამშრომელთა შემცირების შესახებ, ძალიან მომწონს - პოზიცია დებიუროკრატიზაციისა და დეოლიგარქიზაციის შესახებ. ეს არის ის, რასაც ოდესა და უკრაინა ელოდება“, - განაცხადა პოროშენკომ.


ამავე შეხვედრაზე უკრაინის პრეზიდენტმა განაცხადა, რომ მიხეილ სააკაშვილის გუბერნატორად დანიშვნის თემამ დასავლეთშიც დიდი ყურადღება დაიმსახურა. პოროშენკოს განცხადებით, სააკაშვილის დანიშვნით უკრაინის ხელისუფლებამ დაამტკიცა საკუთარი კურსი რეფორმების გატარების და კორუფციის წინააღმდეგ ბრძოლის ერთგულების შესახებ.