თბილისის მერმა, კახა კალაძემ რუსთაველის გამზირზე, პარლამენტის შენობის წინ მიმდინარე აქციასთან დაკავშირებით განცხადება გააკეთა და თქვა, რომ მთავრობის და პარტიის ლიდერები დილიდანვე არიან შეკრებილი და აღნიშნულ საკითხებზე მსჯელობენ.

„რაც შეეხება გუშინდელ ფაქტს, ჩვენ ვისმენთ არაერთგვაროვან განცხადებებს და მიმდინარეობს სპეკულირება იმასთან დაკავშირებით, რომ ეს არის დარტყმა ღამის ეკონომიკაზე, ღამის ეკონომიკის განვითარებაზე, რაშიც ნამდვილად ვერ დავეთანხმები მე. საუბარია, რომ ეს არის დარტყმა კლუბურ მუსიკაზე და ამ დარგის, ასე რომ ვთქვათ, მომავალში მის არსებობაზე. აქ ნამდვილად ვერ დავეთანხმები“, განაცხადა კალაძემ და პირობა დადო, რომ ღამის ეკონომიკა აუცილებლად განვითარდება და კლუბური ცხოვრებაც გაგრძელდება.

„ჩვენ ვამაყობთ რაც ამ მიმართულებით გააჩნია დედაქალაქს, თუმცა უნდა გაიმიჯნოს მეორე, რომელიც არის ძალიან სამწუხარო და მე არავის არ ვთავაზობ შესარიგებელ მატჩს. მე გთავაზობთ ყველას, ჩემო მეგობრებო, ჩემო დებო და ძმებო. მე ვიცი, რომ ჩემდამი ამ ადამიანებს გააჩნიათ გარკვეული პატივისცემა, რასაც მე ნამდვილად ვაფასებ. მე გთავაზობთ, რომ ერთად გავიდეთ ბრძოლის ველზე და ერთად ვებრძლოთ ნარკოტრეფიკს შესაბამის სამსახურებთან ერთად და ერთად ვებრძოლოთ ნარკორეალიზატორებს. ეს რა თქმა უნდა სერიოზულად ურტყამს თუნდაც კლუბურ მუსიკას, ურტყამს იმ კონკრეტულ ახალგაზრდებს, ჩვენ გვიკვდება შვილები, ჩვენ გვიკვდება ძმები, დები, ჩვენი თანამოქლაქეები და აქ მე დარწმუნებული ვარ, რომ ის ახალგაზრდები, რომლებიც დღეს პარლამენტის წინ გამოსულები არიან და მართავენ აქციას, დაგვიდგება თითოეული მათგანი გვერდით და ჩვენ ერთად შევძლებთ დავამარცხოთ და ვებრძოლოთ ნარკორეალიზატორებს“, აღნიშნა კალაძემ და ნარკოპოლიტიკასთან დაკავშირებით შენიშვნებზეც გაამახვილა ყურადღება.

„მინდა მივმართო ახალგაზრდებს, რომ გუნდში ამ მიმართულებით დაწყებულია მუშაობა და ყველა ვთანხმდებით იმაზე, რომ არსებული ნარკოპოლიტიკა არ არის არავისთვის მისაღები. ეს არის ერთი ძალიან დიდი, სერიოზული პრობლემა, რომელიც ყველას გვიქმნის პრობლემას“, თქვა კალაძემ და ახალგაზრდებს ამ მიმართულებით მათთან თანამშრომლობისაკენ მოუწოდა.

რაც შეეხება აქციის მონაწილეთა ულტიმატუმს, პრემიერ მინისტრის და შინაგან საქმეთა მინისტრის გადადგომასთან დაკავშირებით, კალაძემ თქვა:

„ახალგაზრდების ლიდერების მხრიდან იყო გაკეთებული განცხადებები, რომ ემოციურ ფონზე იქნა ეს განცხადებები გაკთებული“.