დუშეთის მუნიციპალიტეტის მერიაში, მასწავლებელთა პროფესიული განვითარების ეროვნული ცენტრის „ასწავლე საქართველოსთვის“ პროგრამის მონაწილეთა, კერძოდ, კონსულტანტ-მასწავლებლის, ნატო გოგატიშვილის ინიციატივით პედაგოგთა კონფერენცია ჩატარდა.

იგი მიზნად ისახავდა პედაგოგებს შორის გამოცდილების გაზიარებასა და პედაგოგთა კარიერული წინსვლის ხელშეწყობას.

კონფერენციას ესწრებოდნენ: დუშეთის მუნიციპალიტეტის მერი ზურაბ სეხნიაშვილი მოადგილეებთან ერთად, ქ.დუშეთის საგანმანათლებლო რესურსცენტრის უფროსი დავით ოსეფაშვილი, წამყვანი და უფროსი მასწავლებლები საქართველოს სხვადასხვა მუნიციპალიტეტიდან, აგრეთვე საქართველოს განათლებისა და მეცნიერების სამინისტროსა და დუშეთის მუნიციპალიტეტის საჯარო სკოლების წარმომადგენლები.

მონაწილე პედაგოგები დამსწრე საზოგადოების წინაშე საკუთარი მოხსენებებით წარდგნენ, რომლებიც კრედიტქულებით შეფასდა. პედაგოგებს გადაეცათ სერტიფიკატები, სკოლებს კი - წიგნების სასაჩუქრე ნაკრები, დუშეთის მუნიციპალიტეტის მერმა ზურაბ სეხნიაშვილმა (დაბლა ფოტოზე ხელმარჯვნივ) ღვაწლმოსილ პედაგოგებს - მზევინარ ხუბულურს და შალვა ბექაურს გაწეული პედაგოგიური მოღვაწეობისთვის მადლობა გადაუხადა და სერტიფიკატები გადასცა.

აღსანიშნავია, რომ კონფერენციის მხარდამჭერნი არიან: საქართველოს განათლებისა და მეცნიერების სამინისტრო; პროგრამა „ასწავლე საქართველოსთვის“; ქ.დუშეთის საგანმანათლებლო რესურსცენტრი; სოფ.არღუნის საჯარო სკოლა და დუშეთის მუნიციპალიტეტის მერიის განათლების, კულტურის, სპორტისა და ახალგაზრდობის საქმეთა სამსახური.

ინფორმაციას და ფოტომასალას დუშეთის მერია ავრცელებს.