წყალტუბოს მუნიციპალიტეტის სოფელ გეგუთში, თამარის ციხეზე, ყოველ წელს „თამარობის“ სახალხო დღესასწაული იმართება. ტრადიცია არც წელს დარღვეულა. თამარის ციხეზე თეატრალიზებული კომპოზიცია დაიდგა.

ღონისძიების ორგანიზატორი იყო „წყალტუბოს მუნიციპალიტეტის კულტურის ცენტრი“.

„თამარობის“ დღესასწაული გეგუთში სპორტული აქტივობებით დაიწყო. გაიმართა ქართული ჭიდაობა და დოღი. გარდა ადგილობრივებისა სპორტულ აქტივობებში , ვანისა და თერჯოლის ნორჩი ფალავანებიც მონაწილეობდნენ.

გამარჯვებულები წყალტუბოს მუნიციპალიტეტის მერიის კულტურის განათლების სპორტისა და ახალგაზრდობის საქმეთა სამსახურის უფროსმა რიმა მარგიანმა და ა(ა)იპ. „წყალტუბოს მუნიციპალიტეტის კულტურის ცენტრის“ დირექტორმა რევაზ მესხმა დააჯილდოვეს.

დღესასწაული გეგუთის კულტურის სახლის აწ გარდაცვლილი დირექტორის ლია ხოტივარის სცენარით წარიმართა. „ ახალგაზრდებმა შთამბეჭდავად გააცოცხლეს საქართველოს დიდებული ისტორიული წარსული და ხოტბა შეასხეს წმინდანად შერაცხულ მეფე თამარს.

ღონისძიებაში მონაწილეობდნენ ადგილობრივი ფოლკლორული ჯგუფები, სკოლის მოსწავლეები და ადგილობრივი მოსახლეობა.

აღსანიშნავია, რომ „თამარობა“ საქართველოში ეროვნულ დღესასწაულად იქცა 1917 წლიდან — ქართული მართლმადიდებელი ეკლესიის ავტოკეფალიის აღდგენიდან.

ქართველთა სამოციქულო ეკლესია 14 მაისს წმინდა თამარის ხსენების დღეს აღნიშნავს. დიდი მეფის ხსენების დღეს საქართველოს ყველა მართლმადიდებელ ტაძარში წირვა-ლოცვა იმართება.

ინფორმაციას წყალტუბის მერია ავრცელებს.