ღაზას სექტორში, ორშაბათს, ისრაელის სამხედრო ძალების მიერ პალესტინელთა მასობრივი ხოცვა-ჟლეტის გამო ისრაელსა და თურქეთს შორის დიპლომატიური უთანხმოება გრძელდება და ოთხშაბათს ისრაელის უმაღლესი რანგის დიპლომატის „შეურაცხყოფით“ გაგრძელდა.

როგორც „The Times of Israel“-ი იტყობინება, თურქეთის საგარეო საქმეთა სამინისტრომ ისრაელის ელჩის გამოძახების შემდეგ იგი ქვეყნიდან გააძევა.

გამოცემის თანახმად, ელჩ ეითან ნაეჰს, რომელსაც უბრძანეს რომ დროებით დაეტოვებინა თურქეთი, აეროპორტი უსაფრთხოების მკაცრი ზომების პირობებში დაატოვებინეს, მას შემოწმებისას ფეხსაცემელიც გახადეს და ამის გადასაღებად აეროპორტში თურქული პრესაც მიიწვიეს. ამან კი ისრაელს საპასუხო ზომების მიღებისკენ უბიძგა.

ისრაელის საგარეო საქმეთა სამინისტრომ თურქეთის ელჩის მოადგილე უმუთ დენიზი სამინისტროს შენობაში გამოიძახა, თან ჟურნალისტებიც მიიწვია, რომ გადაეღოთ მისი იქ მისვლა, დაცვის სამსახურის მიერ შემოწმების პროცედურა და მისთვის დიპლომატიური პასპორტის ჩამორთმევა.

„ამის საფუძველი, სხვა მიზეზებთან ერთად, იყო ისრაელის ელჩის, ეითან ნაეჰის არასათანადო მოპყრობა სტამბოლის აეროპორტში, უსაფრთხოების ბარიერის გადაკვეთისას მკაცრი შემოწმება და თურქული პრესის განზრახ მიყვანა აღნიშნულის გადასაღებად“, აღნიშნულია ისრაელის საგარეო საქმეთა სამინისტროს განცხადებაში.