თერჯოლის მუნიციპალიტეტის ხელმძღვანელი პირები სოფლის ამბულატორიების სამედიცინო პერსონალს შეხვდნენ.

შეხვედრას, რომელიც მერიის სააქტო დარბაზში გაიმართა, ესწრებოდნენ: თერჯოლის მუნიციპალიტეტის მერი ბონდო სოფრომაძე, მოადგილე მერაბ სირაძე, საკრებულოს თავმჯდომარე ნინო ჯანელიძე, მოადგილე ნოდარ ფანჩულიძე, საკრებულოში ჯანმრთელობის დაცვისა და სოციალურ საკითხთა კომისიის თავმჯდომარე ბადრი ბუცხრიკიძე, თერჯოლა-ტყიბულის გაერთიანებული ოლქის დეპუტატისა და ადმინისტრაციულ ერთეულებში მერის წარმომადგენლები, მუნიციპალიტეტის სხვა ხელმძღვანელი პირები. შეხვედრას ასევე ესწრებოდა იმერეთის სოციალური მომსახურების სააგენტოს უფროსის მოადგილე ზაზა აბულაძე.

შეხვედრაზე განიხილეს სახელმწიფოს მიერ დაფინანსებული მუნიციპალიტეტში მოქმედი ჯანდაცვის პროგრამები, ადგილობრივი თვითმმართველობის კომპეტენციები ჯანდაცვისა და სოციალური დაცვის მიმართულებით, სამედიცინო პერსონალის მომსახურების ხარისხი და სხვა აქტუალური საკითხები, რაც მუნიციპალიტეტის მოსახლეობის სრულფასოვანი სამედიცინო მომსახურეობისთვისაა საჭირო.

თერჯოლის მუნიციპალიტეტში ფუნქციონირებს 19 ამბულატორია, რომელიც დაფუძნებულია 100%-იანი წილით მუნიციპალიტეტის მიერ და განთავსებულია მუნიციპალურ შენობებში. 2018 წელს მუნიციპალიტეტის ბიუჯეტიდან გამოყოფილია 37 000 ლარი, რის ფარგლებშიც მოხდება ამბულატორიების ინფრასტრუქტურის მოწესრიგება. ასევე, კომპიუტერითა და ინტერნეტით აღჭურვა.

ინფორმაციას თერჯოლის მუნიციპალიტეტის მერია ავრცელებს.