კუბის სახელმწიფო ავიახაზების კუთვნილი თვითმფრინავი „ბოინგ 737“ ჩამოვარდა და აფეთქდა ჰავანას საერთაშორისო აეროპორტის სიახლოვეს, აფრენიდან მალევე, იტყობინება კუბის მედიაზე დაყრდნობით BBC.

სოციალურ მედიაში კუბის ელჩმა შეერთებულ შტატებში, ხოსე რამონ კაბანასმა დაწერა, რომ თვითმფრინავის ბორტზე 104 მგზავრი იმყოფებოდა. ადგილობრივი მედიის ცნობით კი ბორტზე 110 მგზავრი და ეკიპაჟის 9 წევრი იმყოფებოდა.

კუბის სახელმწიფო მედიის ცნობით, დაღუპულია 100-ზე მეტი ადამიანი. კუბის „კომუნისტური პარტიის“ გაზეთის, „გრანმას“ ცნობით, მხოლოდ სამი ადამიანია გადარჩენილი, ისინი საავადმყოფოში არიან გადაყვანილი, თუმცა მათი მდგომარეობა კრიტიკულია.

(ვიდეოს სანახავად გადადით youtube-ის ბმულზე).

მანამდე თვითმხილველებმა ადგილობრივ მედიას უთხრეს, რომ მათ სასწრაფო დახმარების ავტომანქანები იხილეს, რომელთაც სავარაუდოდ, ავიალაინერის ნამსხვრევებიდან ამოყვანილი გადარჩენილი მგზავრები გადაჰყავდათ საავადმყოფოში.

ეროვნული ავიახაზების, „Cubana de Aviacon“-ის ბოინგი შიდა რეისს ასრულებდა და ჰავანადან კუნძულის აღმოსავლეთით მდებარე ქალაქ ჰოლგუინში მიფრინავდა. თვითმფრინავის ფრენის პერიოდად 1 საათი და 20 წუთი იყო განსაზღვრული.  

ადგილობრივი მედიის ცნობით, თვითმფრინავი ფერმაში ჩამოვარდა და ის ძლიერ დაზიანებული და დამწვარია. ადგილზე სახანძრო-სამაშველო და სასწრაფო დახმარების ჯგუფების დიდი რაოდენობაა მობილიზებული. ავიალაინერის კატასტროფის მიზეზი ჯერჯერობით არ დასახელებულა. 

შემთხვევის ადგილისკენ კუბის მთავრობის ოფიციალური პირები გაემართნენ, მათ შორის პრეზიდენტი მიგელ დიას კანელი.

ჰავანას საერთაშორისო აეროპორტი, რომელიც კუბის დედაქალაქიდან სამხრეთ-დასავლეთ ნაწილში 9 მილის დაშორებით მდებარეობს, ყოველწლიურად თითქმის 6 მილიონ მგზავრს იღებს.