ტეხასის სკოლაში განხორციელებული სროლების შედეგად, 10 ადამიანია მოკლული და სხვა 10 კი დაჭრილი, მათგან, პოლიციის განცხადებით, უმეტესობა სკოლის მოსწავლეები არიან.

ჰიუსტონის სამხრეთით დაახლოებით 65 კილომეტრში მდებარე „სანტა ფე“-ს სკოლაზე პარასკევს განხორციელებული თავდასხმის შემდეგ პატიმრობაშია აყვანილი ერთი პირი, რომელიც პოლიციის ცნობით, ამავე სკოლის 17 წლის მოსწავლეა და რომელმაც ცეცხლსასროლი იარაღი და რევოლვერი სავარაუდოდ, წამოიღო მამამისისაგან, რომელიც კანონიერად ფლობდა ამ იარაღებს.

ტეხასის გუბერნატორმა, გრეგ აბოტმა განაცხადა, რომ სკოლაში „სხვადასხვა სახის ასაფეთქებელი მოწყობილობებია“ ნაპოვნი, მათ შორის „მოლოტოვის კოქტეილები“.

აბოტის თქმით, პოლიციამ ეჭვმიტანილის დღიურებში, კომპიუტერში და მობილურ ტელეფონში აღმოაჩინა ინფორმაციები, რომელიც მიუთითებს იმაზე, რომ 17 წლის ბიჭი ამ თავდასხმას წინასწარ გეგმავდა და ამის შემდეგ თავის მოკვლა ჰქონდა განზრახული, თუმცა ტეხასის გუბერნატორის თქმით, მან „ხელი აიღო მის ამ განზრახვაზე“, რადგან „მას არ აღმოაჩნდა თავის მოკვლის გაბედულება“.

მათ შორის, ვისაც ჭრილობები აქვს მიღებული, „სანტა ფე“-ს სკოლის პოლიციის ოფიცერი ჯონ ბარნესიცაა. ადგილობრივი მედიის ცნობით, მისი მდგომარეობა კრიტიკულია და მას გადაუდებელი ოპერაცია უტარდება.

ასევე პარასკევს, ატლანტას სკოლის დამამთავრებელი კლასების საზეიმო ცერემონიაზე, სკოლის გარეთ მოკლულია ერთი ქალი და დაჭრილი ასევე ერთი.

როგორც BBC ამერიკულ მონიტორინგის ჯგუფზე დაყრდნობით იტყობინება, მხოლოდ მიმდინარე წელს, ამ დრომდე, შეერთებულ შტატებში სროლების ინციდენტების შედეგად 5 000-ზე მეტი ადამიანია მოკლული.