ვინძორის სასახლეში, წმინდა გიორგი სამლოცველოში პრინცმა ჰარიმ და მეგან მარკლიმ საქორწინო ბეჭდები გაცვალეს და თავიანთი აღთქმა დადეს.

ჰარი და მეგანი დაქორწინებულები არიან. 

შუადღის განმავლობაში წმინდა გიორგის სახელობის სამლოცველოს დარბაზში სამეფო წყვილისა და მათი სტუმრებისთვის მიღება იმართება.

მოგვიანებით, საღამოს, პრინცი ჩარლზი „ფროგმორის სახლში“ სამეფო წყვილის, მათი 200 ახლო მეგობრისა და ოჯახებისთვის კერძო მიღებას გამართავს.

ცერემონია დაგეგმილზე 6 წუთის დაგვიანებით დაიწყო. 

პრინც ჰარისთან მეგან მარკლი მისმა მამამთილმა, პრინცმა ჩარლზმა მიაცილა. სამეფო ქორწილს მეგანის მამა, ავადმყოფობის გამო ვერ ესწრება.

სტუმრებს შორის არიან როგორც ახალგაზრდა თაობის ცნობილი ადამიანები, ასევე ვეტერანები. 600 დაპატიჟებულ სტუმარს შორის არიან ოპრა უინფრი, ჯორჯ და ამალ კლუნები, დევიდ და ვიქტორია ბეკჰემები და ელტონ ჯონი.

პოლიტიკოსები, მათ შორის პრემიერ მინისტრი ტერეზა მეი, არ არიან დაპატიჟებული, რადგანაც ქორწილი არ არის სახელმწიფო ღონისძიება, იუწყება BBC.

ცერემონია წმინდა გიორგის სამლოცველოში მიმდინარეობს.

დედოფალმა ელისაბედ მეორემ პრინ ჰარის სასექსის ჰერცოგობა უბოძა, მისი მეუღლე მარკლი კი სასექსის ჰერცოგინია ხდება.

პრინცმა, რომელიც მეექვსეა სამეფო ტახტის ხაზით, ასევე დამბარტონის გრაფობა და კილკილის ბარონობა მიიღო.

ვინძორის სასახლესთან წყვილის ათასობით კეთილისმსურველია შეკრებილი, სამეფო წყვილის ასეულობით თაყვანისმცემელმა კი კარვები ვინძორის მიმდებარედ რამდენიმე დღის წინ გაშალა, რათა საუკეთესო ადგილებიდან მიედევნებინათ თვალი საქორწილო ცერემონიისთვის.

ქორწილის წინა დღეს, 33 წლის პრინცმა ჰარიმ ვინძორთან შეკრებილებს უთხრა, რომ იგი თავს „დასვენებულად“ გრძნობდა, ხოლო 36 წლის მარკლიმ განაცხადა, რომ ის თავს „ჩინებულად“ გრძნობდა.

პრინც ჰარის ბეჭედი პლატინისაგან, ხოლო მარკლის საქორწინო ბეჭედი კი უელსის ოქროსაგან არის დამზადებული, განაცხადა კენსინგტონის სასახლემ.