ნინოწმინდის მუნიციპალიტეტში მიმდინარე წელს რეგიონული განვითარებისა და მუნიციპალური განვითარების ფონდების, ასევე ადგილობრივი ბიუჯეტის დაფინანსებით არაერთი მნიშვნელოვანი პროექტი განხორციელდება. 2018 წელს დაგეგმილ პროექტებთან დაკავშირებით GUARDIAN.GE-ს ნინოწმინდის მერი ანივარდ მოსოიანი ესაუბრა.

როგორც მერმა განაცხადა, ერთ-ერთი მნიშვნელოვანი პროექტი, რომლის განხორციელებაც უკვე დაწყებულია, ქალაქ ნინოწმინდის ქუჩების კეთილმოწყობას გულისხმობს.

„ნინოწმინდაში ქუჩების მოასფალტება მიმდინარეობს. სულ 11 ქუჩის გაკეთებაა გათვალისწინებული. აღნიშნული სამუშაოების დაფინანსების წყარო კი, რეგიონული განვითარების ფონდია. ასევე აღნიშნული ფონდის მიერ დაფინანსდა სოფლების, სათხე-სპასოვკას დამაკავშირებელი გზის მოასფალტება. აღნიშნული პროექტი წელს დაიწყო და უკვე დასრულდა.

გვაქვს ადგილობრივი ბიუჯეტით გათვალისწინებული პროექტებიც. ამ ეტაპზე მიმდინარეობს გარე განათების მოწყობის სამუშაოები როგორც თავად ქალაქ ნინოწმინდაში, ისე სოფლებშიც. ადგილობრივი ბიუჯეტიდან ვაფინანსებთ ასევე საქალაქო ბაღში მინი სტადიონის მოწყობის სამუშაოებს. გვაქვს პროექტი, რომელიც ითვალისწინებს გზის ავტოსავალი ნაწილის განახლებასა და ორმოულ შეკეთებას ქალაქ ნინოწმინდაში. სამუშაოები ადგილობრივი ბიუჯეტიდან ფინანსდება. ერთი პროექტი გვაქვს მუნიციპალური განვითარების ფონდის მიერ დაფინანსებული, რომელიც სოფელ ეშტიამდე მისასვლელი გზის მოასფალტებას გულისხმობს. ეს პროექტი მუნიციპალური განვითარების ფონდთან ერთად, ადგილობრივი ბიუჯეტის თანადაფინანსებით განხორციელდება. არის ასევე პროექტები, რომლებიც საბავშვო ბაღებში აღდგენით სამუშაოებს ითვალისწინებს. დაგეგმილია ასევე მინი სტადიონებისა და რიტუალების სახლების მშენებლობა", განუცხადა GUARDIAN.GE-ს ანივარდ მოსოიანმა.