საქართველოს ყოფილი პრეზიდენტი მიხეილ სააკაშვილი „რუთავი 2“-ის ეთერში „ღვთისმშობლის აგდებულად მოხსენებას“ ეხმაურება და აცხადებს, რომ ეს „შეურაცხყოფს ყველა მორწმუნე ქრისტიანის გრძნობებს, ისევე როგორც საკუთარი დედის აუგად მოხსენიება“.

„გიორგი გაბუნია არის ძალიან კარგი ჟურნალისტი, მაგრამ ამ ბოლო დღეებში, მისი გამოსვლა, სხვა არაფერი იყო, თუ არა დიდი შეცდომა და ჩავარდნა.

ყველას უნდა ესმოდეს, რომ ზღვარგადასული არ ვარგა არაფერი. ღვთისმშობლის აგდებულად მოხსენიება შეურაცხყოფს ყველა მორწმუნე ქრისტიანის გრძნობებს, ისევე როგორც საკუთარი დედის აუგად მოხსენიება. პირადად ჩემთვის, ეს იყო ძალიან უსიამოვნო სანახავი.

ვთხოვ ყველას, გავუფრთხილდეთ ერთმანეთის გრძნობებს და თავი შევიკავოთ უაზრო წყენის მიყენებისგან და როდესაც ასეთი რამ ხდება, ჩვენ გვაქვს უფლება მოვითხოვოთ საჯარო ბოდიში! ამავე დროს, მიუღებელია ამ თემის, ერთი ჟურნალისტიდან, მთლიანად რუსთავი ორზე განვრცობა და მთელს ტელევიზიაზე აგრესიის გადატანა, რაც პირდაპირ შედის ქართველი ხალხისა და საქართველოს ეკლესიის მტრის, ბიძინა ივანიშვილის, ინტერესებში!“, დაწერა სააკაშვილმა „ფეისბუქის“ საკუთარ გვერდზე მას შემდეგ, რაც საქართველოს საპატრიარქომ აღნიშნულთან დაკავშირებით საგანგებო განცხადება გაავრცელა.

თავად „რუსთავი 2“ და მისი გენერალური დირექტორი ნიკა გვარამია აცხადებს, რომ მის ტელევიზიას და ჟურნალისტ გაბუნიას „საბოდიშო არაფერი აქვს“ და შესაბამისად, ბოდიშის მოხდასაც არ აპირებს.