საქართველოს დემოკრატიული რესპუბლიკის 100 წლის იუბილესა და დამოუკიდებლობის დღესთან დაკავშირებით თბილისში, თავისუფლების მოედანზე ფიცის დადების ცერემონია გაიმართა.

დედაქალაქთან ერთად, ფიცის დადების ცერემონიალი შინდისში, ვარძიაში, კოჯორში-ქოროღლის ციხესთან, გელათსა და ბათუმშიც ჩატარდა.

სამხედრო ფიცი საწყისი საბრძოლო მომზადების ცენტრის 366-მა რეკრუტმა და 123-მა წვევამდელმა დადო.

დამოუკიდებლობის დღისადმი მიძღვნილ ცერემონიალში მონაწილეობდა წვრთნისა და შეფასების ცენტრის JTEC (CTC) ინსტრუქტორთა შემადგენლობა, DRILL სერჟანტთა კოლოფი, კადეტთა სამხედრო ლიცეუმის კადეტები, ეროვნული თავდაცვის აკადემიის იუნკერები, ქართულ-ამერიკული პროექტის - "საქართველოს თავდაცვის მზადყოფნის პროგრამაში" (GDRP) მონაწილე 43-ე ბატალიონი, აშშ-ის შეიარაღებული ძალების ინსტრუქტორები და რეკრუტების 6 კოლოფი.

დამოუკიდებლობის დღისადმი მიძღვნილ ცერემონიალში კადეტთა სამხედრო ლიცეუმის კოლოფი პირველი დემოკრატიული რესპუბლიკის დროინდელ სამხედრო ფორმებით მონაწილეობდა.

საქართველოს დამოუკიდებლობის დღესთან დაკავშირებით თავისუფლების მოედანზე სამხედრო ტექნიკის, შეიარაღებისა და აღჭურვილობის გამოფენაც მოეწყობა. გამოფენის მნიშვნელოვანი სიახლეა ახლადშეძენილი ტანკსაწინააღმდეგო სისტემა "ჯაველინი". მოედანზე ასევე, წარმოდგენილი იქნება: ეჯდერი, GM 403, MaxPro, რაფაელი, დანა, ლარ-160, "ჩინგორი", "დიდგორი", "ლაზიკა", სამედიცინო-საევაკუაციო ჯავშანმანქანა, "ჰამერი", RM-70; GMM-120 თვითმავალი ნაღმტყორცნი.

ფიცის დადების შემდეგ, თავისუფლების მოედანზე შეკრებილებს სიტყვით პრეზიდენტმა, გიორგი მარგველაშვილმა და პრემიერ მინისტრმა, გიორგი კვირიკაშვილმა მიმართეს.

ქართველ ხალხს მიმართავენ და დამოუკიდებლობის ეროვნულ დღესასწაულს მიულოცავენ ლიეტუვის, ლატვიის, პოლონეთის, სლოვაკეთის, ფინეთის, სომხეთისა და ევროკომისიის პრეზიდენტები.