საქართველოს ძიუდოს ფედერაციის პრეზიდენტის, დავით ქევხიშვილის გადადგომას ითხოვენ თბილისში, პარლამენტის შენობასთან საპროტესტო აქციაზე შეკრებილი ქართველი ძიუდოისტები. ისინი პრემიერ მინისტრ გიორგი კვირიკაშვილთან შეხვედრას და საკითხის გადაწყვეტაში მის ჩართულობასაც ითხოვენ.

აქციას პირველად, ღიად შეუერთდა ოლიმპიური ჩემპიონი ზურაბ ზვიადაური, რომელმაც ქევხიშვილის გადადგომის მოთხოვნა სოციალურ ქსელში პირველმა გააჟღერა. პარლამენტის შენობასთან ძიუდოისტების მხარდასაჭერად მივიდა ასევე სახელოვანი ვეტერანი სპორტსმენი გურამ საღარაძე.

„დატოვოს თანამდებობა დავით ქევხიშვილმა, გამომდინარე იქიდან, რომ იგი არის ერთპიროვნული მმართველი. იგი ნათლად აფიქსირებს თავისი მიდგომით და თავისი პოზიციით, რომ მას არ სურს ჩვენი ნაკრებში დაბრუნება. აქიდან გამომდინარე ჩვენ კიდევ უფრო მეტნი ვართ და კიდევ უფრო მეტი ადამიანი ვითხოვთ მის გადადგომას“, განაცხადა ვარლამ ლიპარტელიანმა „რუსთავი 2“-თან საუბრისას.

ძიუდოისტი ადამ ოქრუაშვილი კი ამბობს, რომ ამ ეტაპზე უკვე ჩიხური მდგომარეობაა შექმნილი და საკითხის გადაწყვეტაში აუცლებელია პრემიერ მინისტრის ჩარევა.

„ჩვენ გვინდა შეხვედრა პრემიერთან, არა მარტო პრემიერთან, არამედ ყველა იმ ადამიანთან, ვისაც შეუძლია ამ თემის მოგვარება. სიტუაცია არის ჩიხში შესული. ძალიან მიჭირს ვიფიქრო იმაზე რომ შეიძლება ამ ბიჭებმა ვერ იჭიდავონ მსოფლიო ჩემპიონატზე... ამის საფრთხე არსებობს, რადგან ეს ადამიანი არ ფიქრობს წასვლას და ეს ადამიანი თუ არ წავა, დამერწმუნეთ რომ აზრი არ აქვს არანაირ მომზადებას, არანაირ ვარჯიშს, იმიტომ, რომ ხელის შეშლის და შეფერხების მეტი არაფერი მოდის მაგ ადამიანისაგან“, უთხრა ადამ ოქრუაშვილმა „რუსთავი 2“-ს.

ზურაბ ზვიადაურმა კი თქვა, რომ ქევხიშვილს თანამდებობიდან წასვლა უნდა, მაგრამ მას მისი გარემოცვის წევრები „არ უშვებენ, ქეჩოთი უჭირავთ“.