ხორავას ქუჩაზე მომხდარი მკვლელობის საქმეზე ბრალდებული ერთ-ერთი არასრულწლოვნის ადვოკარი ტარიელ კაკაბაძე აცხადებს, რომ დამოუკიდებელ ექსპერტ მაია ნიკოლეიშვილს არ უთქვამს, რომ მკვლელობის იარაღი აპრიორი მაკრატელია.

კაკაბაძე პროკურატურის მიერ საქმის მასალების ნაწილის გამოქვეყნებას გამოეხმაურა და აღნიშნა, რომ „ამის უფლება არც ბრალდების მხარეს არ ჰქონდა და ამის უფლება არც დაცვის მხარეს არ აქვს".

„ექსპერტმა თქვა ასეთი რამ - გამოყენებულია სხვადასხვა საგნები, რომლებიც არ არის დანა. გამოყენებულია სხვადასხვა მჭრელი ბასრი საგნები, რომლებიც კატეგორიულად ვაცხადებ რომ, არ არის საქმეში არსებული დანები - ეს თქვა ექსპერტმა. თუმცა, ამ საგნებში რომელიმე შესაძლებელია იყოს მაკრატლის მსგავსი საგანიო. აი, ეს თქვა ექსპერტმა. აპრიორი მაკრატელია გამოყენებული - ასეთი რამ ექსპერტს არ უთქვამს", განაცხადა ტარიელ კაკაბაძემ ჟურნალისტებთან საუბრისას.

პროკურატურამ დღეს არასრულწლოვნების საქმის მასალების ნაწილი გაასაჯაროვა. როგორც საგამოძიებო უწყებაში გამართულ ბრიფინგზე თბილისის პროკურორმა განაცხადა, „ამოღებული იქნა სამედიცინო მაკრატელი. ჩატარებული საგამოძიებო მოქმედებებით დადგინდა, რომ ეს მაკრატელი ეკუთვნოდა შემთხვევის ადგილზე მისულ სასწრაფო სამედიცინო დახმარების ბრიგადას, რომელთაც დარჩათ ეს ნივთი შემთხვევის ადგილზე შესაბამისი დახმარების გაწევის შემდგომ. აღნიშნული გარემოება დადასტურდა  შემთხვევის ადგილას მყოფი ექიმების ჩვენებით, რომელთა ეჭვქვეშ დაყენების არანაირი საფუძველი არ არსებობს. აღნიშნულთან დაკავშირებით ხაზგასმით უნდა აღვნიშნოთ, რომ ჩატარებული ყველა სხვა საგამოძიებო მოქმედებით, მათ შორის მოწმეების დაკითხვით, სხვა მაკრატლის ან მსგავსი საგნის არსებობა არ დგინდება".