„ევროპული საქართველო“, სირიის არაბთა რესპუბლიკის მიერ აფხაზეთისა და ე.წ. სამხრეთ ოსეთის „დამოუკიდებლობის“ აღიარებასთან დაკავშირებით, საგარეო უწყების ხელმძღვანელს პარლამენტში დაიბარებს.

როგორც პარტიის წევრი სერგი კაპანაძე აცხადებს, აუცილებელია, მოისმინონ მთავრობის გეგმის შესახებ, თუ რა ნაბიჯების გადადგმას აპირებენ ამ მიმართულებით.

„ყველაზე ცუდ დროს, როდესაც სირია ცეცხლში იყო გახვეული და ასადის გადარჩენის საკითხი ეკიდა პირდაპირ მოსკოვზე, მაშინაც კი არ უღიარებია მას აფხაზეთის დამოუკიდებლობა და ცხინვალი დამოუკიდებლობა. ჩვენ ახლა პასუხები უნდა მივიღოთ მთავრობისგან, რა ნაბიჯები იგეგმებოდა და რის გადადგმას აპირებს. ამიტომ, ვაპირებთ, რომ დავიბაროთ საგარეო საქმეთა მინისტრი. ახლა, რა თქმა უნდა, მყისიერად უნდა იქნას გაწყვეტილი დიპლომატიური ურთიერთობები სირიასთან და მყისიერად უნდა იქნას გააქტიურებული ჩვენი დიპლომატია ახლო აღმოსავლეთში, იმიტომ, რომ სირია არის მაინც გავლენიანი ქვეყანა და მნიშვნელოვანია, რომ რაიმე გაგრძელება ამ აღიარებას არ მოჰყვეს", განაცხადა სერგი კაპანაძემ.

სირიის გადაწყვეტილებას გამოეხმაურნენ „ერთიან ნაციონალურ მოძრაობაშიც". როგორც სალომე სამადაშვილმა განაცხადა, იმისთვის, რომ სირიის რეჟიმის აღიარებას არ მოჰყვეს რეგიონში სხვა ქვეყნების მიერ მსგავსი ნაბიჯის გადადგმა, მნიშვნელოვანია, საქართველომ გაწიოს ყველანაირი დიპლომატიური ძალისხმევა.

აფხაზეთისა და ე.წ. სამხრეთ ოსეთის „დამოუკიდებლობის“ აღიარებასთან დაკავშირებით საქართველოს საგარეო საქმეთა სამინისტროში განაცხადეს, რომ აღიარება „საერთაშორისო სამართლის ფუნდამენტური ნორმებისა და პრინციპების უხეში დარღვევით" მოხდა.

როგორც მინისტრის მოადგილემ, დავით დონდუამ განაცხადა, საგარეო საქმეთა სამინისტრომ სირიის არაბთა რესპუბლიკასთან დიპლომატიური ურთიერთობების გაწყვეტის პროცედურები დაიწყო.