გაეროს განვითარების პროექტის მხარდაჭერით, ბიოლოგიურ მეურნეობათა ასოციაცია ,,ალკანამ“ სამტრედიის მუნიციპალიტეტში იანეთის თემს, 2 ათასი მეტრი მიწის ნაკვეთისთვის შესაღობი მასალა საჩუქრად გადასცა. ბადე-მავთული, რომელიც სოფელს ორგანიზაციის მიერ კეთილი ნების ფარგლებში გადაეცა, დაახლოებით 26 ათასი ლარის ღირებულებისაა.


ორგანიზაცია ,,ალკანა“ სამტრედიის მუნიციპალიტეტში, გომში, ილორისა და იანეთში აგრო-ტყეების განაშენიანებას აწარმოებს. პროექტი წლის ბოლომდე დასრულდება და ორგანიზაციის წარმომადგენლები ამ ხნის განმავლობაში, განაშენიანებულ ტერიტორიებზე მონიტორინგს ჩაატარებენ. როგორც ცნობილია, აგროტყეების ფარგლებში, ტერიტორიების ნეკერჩხლის, კოპიტის, ტირიფის და ცაცხვის ნერგებით განაშენიანება მოხდა. რაც შეეხება სოფელ იანეთისთვის გადაცემულ მასალას, მოსახლეობის პრიორიტეტებიდან გამომდინარე, მდინარე გუბისიწყლის მარცხენა სანაპიროზე მდებარე კერძო ნაკვეთების შემოღობვითი სამუშაოები განხორციელდება.


პროექტი, რომლის სახელწოდებაა ,,წყალდიდობისა და წყალმოვარდნის მართვის მედეგი პრაქტიკის შემუშავება საქართველოში მოწყვლადი მოსახლეობის დასაცავად“, სამტრედიის მუნიციპალიტეში აქტიურად ხორციელდება. როგორც დღეს ორგანიზაციის წარმომადგენელმა მუნიციპალიტეტის გამგებელთან და სოფლის რწმუნებულთან შეხვედრაზე აღნიშნა, პროექტის ფარგლებში ადგილობრივ ხელისუფლებასთან თანამშრომლობა შესაძლებელია მომავალშიც გაგრძელდეს.


,,ამ პროექტის ფარგლებში შემოიღობება 2 კმ. სიგრძის ნაკვეთი და დაცული იქნება საქონლისგან. ასევე პროექტის ფარგლებში მოხდება იანეთის თემში ხეების დარგვა. ეს ძალიან კარგი პროექტია, რადგან ამით მნიშვნელოვნად ხდება ბიოლოგიური პროცესებისთვის ხელშეწყობა“, - აღნიშნა სამტრედიის მუნიციპალიტეტის გამგებელმა ველერი ფოცხვერიამ.