ექსპერტ გია ხუხაშვილის აზრით, იმისთვის, რომ მმართველმა პოლიტიკურმა ძალამ მართვის სადავეები შეინარჩუნოს, აუცილებელია „მიწის ამობრუნება" - მმართველობითი სისტემის კრიზისის გადალახვა.

როგორც GUARDIAN.GE-ს ხუხაშვილმა ხორავას ქუჩაზე მომხდარი მკვლელობის საქმეზე ბოლო დროს განვითარებულ მოვლენებთან დაკავშირებით განუცხადა, მდგომარეობას ვერ გამოასწორებს გადადგომა „ერთი პროკურორის" ან „ერთი კვირიკაშვილის", რომელიც როგორც ექსპერტი ამბობს, პრინციპული ფიგურა არც არის.

ხუხაშვილი შექმნილი „კრიზისული ვითარებიდან" „ქართული ოცნებისთვის" საუკეთესო გამოსავლად სისტემური ცვლილებების განხორციელებას მიიჩნევს, საიმისოდ, რომ გაჩნდეს შანსი საზოგადოებასა და ხელისუფლებას შორის ნდობის აღსადგენად.

როგორც ექსპერტი ამბობს, „გააკეთებენ - გააკეთებენ, არ გააკეთებენ და ამ შემთხვევაში, ამ კრიზისზე იქნება თუ სხვა მიზეზით იქნება, ხელისუფლება ფატლურად დაასრულებს".

„ძალიან სწრაფად ვითარდება მოვლენები და მე ვფიქრობ, რომ მით უმეტეს იმ ფონზე, როდესაც ინსტიტუტების მიმართ ნდობა არის ძალიან დაბალი და ამას ყველა ბოლო კვლევა აჩვენებს, დადგა დრო, როდესაც მიწაა ამოსაბრუნებელი - ანუ ილუზია, რომ იმ სისტემის, დანაშაულებრივ სისტემის, რომელიც ჩამოყალიბდა თავის დროზე, ტრანსფორმაცია შესაძლებელი იყო, ამისი ილუზია აღარ უნდა ჰქონდეს არავის. ანუ ის სისტემა უნდა დაინგრეს და რაღაც ახალი უნდა აშენდეს. ამას სჭირდება ძალიან სერიოზული სისტემური გადაწყვეტილებები.

მე კვირიკაშვილი არ მიმაჩნია პრინციპულ ფიგურად, ის საერთოდ არც არასოდეს არაფერს წარმოადგენდა, არც არაფერს აკეთებდა და არც არაფერს აფუჭებდა, ამიტომ, მასზე ლაპარაკი ზედმეტად მიმაჩნია. სისტემური ცვლილებებია საჭირო, სისტემა უნდა გადაიხედოს, მთელი ვერტიკალი უნდა ამობრუნდეს იმისთვის, რომ გაჩნდეს შანსი, რომ აღდგეს ნდობა საზოგადოებასა და ხელისუფლებას შორის. თუ ეს ნაბიჯი იქნა გადადგმული, მაშინ ხელისუფლებას ჯერ კიდევ აქვს შანსი, რომ თავიც გადაირჩინოს და ქვეყანაც აარიდოს სერიოზულ რყევებს, ასე რომ, ეს არის გასაკეთებელი. გააკეთებენ - გააკეთებენ, არ გააკეთებენ და ამ შემთხვევაში, ამ კრიზისზე იქნება თუ სხვა მიზეზით იქნება, მე ვფიქრობ, ხელისუფლება ფატალურად დაასრულებს. გამოსავალი ერთია - მმართველობითი სისტემის კრიზისის გადალახვა და ამას სჭირდება მიწის ამობრუნება, ამას პროკურორის გადადგომა და თუნდაც ერთი კვირიკაშვილის გადადგომა არ შველის. შეძლებენ - აქვთ პერსპექტივა, ვერ შეძლებენ? - მაშინ, არ აქვთ", განუცხადა GUARDIAN.GE-ს გია ხუხაშვილმა.