მთავრობის გადადგომას და ვადამდელი საპარლამენტო არჩევნების დანიშვნას მოითხოვს ქართული ოპოზიციური სპექტრი და უცვლელად ტოვებს ზაზა სარალიძის და ზვიად კუპრავას მიერ ბოლო დღეებში გაჟღერებულ მოთხოვნებს მას შემდეგ, რაც ზაზა სარალიძემ პოლიტიკურ პარტიებს გვერდში დგომისაკენ მოუწოდა და მის ამ მოწოდებას ოპერატიულად გამოეხმაურა ოპოზიცია.

რუსთაველის გამზირზე გაშლილ კარავში ზაზა სარალიძეს, ზვიად კუპრავას, მალხაზ მაჩალიკაშვილსა და ოპოზიციას შორის გამართული შეხვედრა უკვე დასრულდა და მხარეები შეთანხმდნენ, რომ 3 ივნისს, 18:00 საათზე საინფორმაციო მიტინგს გამართავენ და სამოქმედო გეგმას გააცნობენ საზოგადოებას.

„ხალხის რაოდენობას ჩვენ გაჩვენებთ. გადაიჭედება რუსთაველი და მთელი თბილისი და ამის გარანტიას ვაძლევ „ქართულ ოცნებას“, განაცხადა პოლიტიკური პლატფორმის, „ახალი საქართველოს“ ლიდერმა, გიორგი ვაშაძემ.

ოპოზიციური პარტიებიდან კარავში გამართულ შეხვედრაზე „ერთიანი ნაციონალური მოძრაობის“, „ედპ“-ს, „ახალი საქართველოს“ და სხვა პოლიტიკური ძალების წარმომადგენლები იმყოფებოდნენ.