თბილისში, ხორავას ქუჩაზე მოკლული ერთ-ერთი არასრულწლოვნის მამამ, ზაზა სარალიძემ პარლამენტის შენობის წინ მიმდინარე აქციაზე, პროცესებში პოლიტიკური პარტიების ჩართვა მოითხოვა.

სარალიძის ამ განცხადების შემდეგ, ოპოზიციური პარტიების ნაწილთან კონსულტაციები გაიმართა, რასაც ოპოზიციონერი ლიდერების მიერ რუსთაველის გამზირზე შეკრებილთათვის სიტყვით მიმართვა მოჰყვა.

ედპ-ს ლიდერის, ბაჩუკი ქარდავას თქმით, პოლიტიკური პარტიები სამოქმედო გეგმას ჩამოაყალიბებენ, რომელიც 3 მაისს, 18:00 საათზე პარლამენტის შენობასთან საინფორმაციო მიტინგზე გახდება ცნობილი.

„მოგესალმებით კიდევ ერთხელ მებრძოლებო - თქვენ თავდადებას გაუმარჯოს. ამ თასხმა წვიმაში აქ დგახართ ზაზა სარალიძის, მალხაზ მაჩალიკაშვილის გვერდით, მაგრამ ყველამ ძალიან კარგად ვიცით, სამი დღის განმავლობაში ბიძინა ივანიშვილი ცდილობდა ამ ადამიანების გაშავებას, რათა ის ხალხი, რომელიც გულისტკივილით უყურებდა ამ პროცესებს, ტელევიზორთან ცრემლებს ღვრიდა ამ ვაჟკაცი მამების ტკივილისა და ტრაგედიის გამო, ამ ხალხს ეს რეჟიმი დასცინოდა. ეს დღეები მათ სუს-ი უგზავნიდა პროვოკატორებს, ხორციელდებოდა ამთზე ზეწოლა. ჩვენ, პოლიტიკური პარტიები ყველანაირად ვცდილობდით მიუხედავად იმისა, რომ ეს იყო ივანიშვილის გეგმა რომ პოლიტიკური პარტიები გაემიჯნა ამ ბრძოლისგან, მან ეს ვერ მოახერხა, უფრო მეტიც - გაგვაერთიანა  ზაზასთან და მალხაზთან ერთად. ხვალ, 18:00 საათზე, ყველა შევიკრიბებით და სამოქმედო გეგმა გახდება ცნობილი", განაცხადა ედპ-ს ლიდერმა.

შეკრებილებს სიტყვით მიმართეს ასევე „ერთიანი ნაციონალური მოძრაობის" პოლიტიკური საბჭოს თავმჯდომარემ ნიკა მელიამ, პოლიტიკური პლატფორმის, „ახალი საქართველოს“ ლიდერმა გიორგი ვაშაძემ, თემირლან მაჩალიკაშვილის მამამ, მალხაზ მაჩალიკაშვილმა.