საქართველოს მთავრობის ადმინისტრაციის უფროსის, შალვა თადუმაძის განცხადებით, გიორგი კვირიკაშვილი ზაზა სარალიძეს და დავით დადუნაშვილს ადვოკატებთან ერთად შეხვდება.

როგორც თადუმაძემ რამდენიმე წუთის წინ ჟურნალისტებს განუცხადა, მთავრობის მეთაური ასევე მალხაზ მაჩალიკაშვილს მის ადვოკატთან ერთად მიიღებს.

მისივე თქმით, შეხვედრას სარალიძის მოთხოვნოთ, შს მინისტრი გიორგი გახარია და სახალხო დამცველი ნინო ლომჯარიაც დაესწრებიან.

ზაზა სარალიძემ გიორგი კვირიკაშვილთან შეხვედრის სურვილის შესახებ განცხადება გუშინ, 3 ივნისს პარლამენტის წინ მიმდინარე აქციაზე გააკეთა.

პრემიერ მინისტრმა სარალიძესთან და მასთან ერთად, ხორავას ქუჩაზე მოკლული მეორე არასრულწლოვნის მშობლებთან შეხვედრის მზაობა დღეს დილით გამოთქვა.

„გიორგი კვირიკაშვილი მზად არის, „პოლიტიკურად ანგაჟირებული პირების“ გარეშე, შეხვდეს ხორავას ქუჩაზე მოკლული ორივე მოზარდის მშობლებს", აცხადებდნენ პრემიერის პრესსამსახურში.

კვირიკაშვილის პრესსამსახურის აღნიშნულ განცხადებაში არაფერი იყო ნათქვამი მალხაზ მაჩალიკაშვილთან შეხვედრაზე, რასაც პანკისში სპეცოპრაციის დროს მოკლული თემირლან მაჩალიკაშვილის მამის პროტესტი მოჰყვა.

მალხაზ მაჩალიკაშვილმა ჟურნალისტებთან საუბარში აღნიშნა, რომ პრემიერი არ ხვდება, „იმიტომ, რომ მე ვარ მუსლიმი, სხვა რელიგიის ადამიანი, მე ვარ ტერორისტი".

მოგვიანებით, ის მთავრობის კანცელარიასთან მაინც მივიდა. სწორედ აღნიშნულის შემდეგ გააკეთა მთავრობის ადმინისტრაციის უფროსმა განცხადება, რომლის მიხედვითაც, გიორგი კვირიკაშვილი მალხაზ მაჩალიკაშვილს ადვოკატთან ერთად შეხვდებოდა.