ეკონომიკისა და მდგრადი განვითარების მინისტრი დიმიტრი ქუმსიშვილი მეტროს მემანქანეების გამოფიცვას გამოეხმაურა. ქუმსიშვილი დარწმუნებულია, რომ თბილისის მერი შექმნილ ვითარებაში „აკეთებს ყველაფერს, აკეთებს მაქსიმუმს, რაც არის შესაძლებელი".

ეკონომიკის მინისტრის აზრით, მემანქანეებმა უნდა გაითვალისწინონ, რომ მეტრო არის ძირითადი ტრანსპორტი, რითაც გადაადგილდებიან თბილისელები.

„მეტროს მემანქანეებმაც უნდა გაითვალისწინონ ის, რომ ეს არის ის ძირითადი ტრანსპორტი, რითაც გადაადგილდებიან თბილისელები და შესაბამისად შესაძლებლობები, რომელიც ქალაქს აქვს უნდა იყოს სწორედ გამოყენებული“, განაცხადა დიმიტრი ქუმსიშვილმა.

თბილისის მეტროპოლიტენი გაფიცვას განაგრძობს, რადგან ხელფასებით უკმაყოფლო მეტროპოლიტენის თანამშრომლებსა და თბილისის მერს შორის გვიან ღამით გლდანში გამართული შეხვედრა უშედეგოდ დასრულდა. 

გლდანში მისვლამდე კახა კალაძე გაფიცულ მემანქანეებს თბილისის მერიაში შეხვდა, თუმცა იმის გამო, რომ შეთანხმება ვერ შედგა, შეხვედრამ გლდანში გადაინაცვლა.

კალაძე გაფიცულებს უხსნიდა, რომ დედაქალაქის ბიუჯეტში მათი ხელფასების მოსამატებლად თანხები 2018 წელს არ არსებობს, თუმცა მომავალი წლიდან მერია აღნიშნულ საკითხზე მსჯელობას დაიწყებდა, რაც მემანქანეებისთვის მიუღებელია.

მემანქანეები გლდანში, დეპოს მიმდებარე ტერიტორიაზე რჩებიან და პროტესტს განაგრძობენ, თუმცა კალაძე მაინც ოპტიმისტურადაა განწყობილი და იმედოვნებს, რომ უახლოეს ხანებში მოხდება პოზიციების შეჯერება და მეტროს მუშაობის განახლება.

4 ივნისს გაფიცული მეტროს მენანქანეების მოთხოვნაა, ხელფასები 45%-ით გაეზარდოთ, რაზეც თბილისის მერია კატეგორიულ უარს აცხადებს.

მერიის გადაწყვეტილებით, დედაქალაქში მუნიციპალური ავტობუსები მგზავრებს დღესაც უფასოდ ემსახურებიან.