ტრამპის ადმინისტრაციამ პირველად დაიწყო ეჭვმიტანილი არალეგალი იმიგრანტების ფედერალურ საპატიმროებში გაგზავნა, რამაც საწოლების დამატებით მოთხოვნა განაპირობა.

1 600 დაკავებული პირის ციხეებში გადაყვანა ხაზს უსვამს საიმიგრაციო პოლიტიკასთან დაკავშირებით პრეზიდენტ ტრამპის მიერ გამოცხადებული „ნულოვანი ტოლერანტობის“ ეგიდით განხორციელებული მასობრივი დაპატიმრებების ტალღის აგორებას.

როგორც BBCიუწყება, 1 000 დაკავებული კალიფორნიაში, ერთადგილიან კამერაში იქნება გადაყვანილი.

კალიფორნიის, ტეხასის და ვაშინგტონის საპატიმრო დაწესებულებების პროფკავშირების ლიდერებმა „როიტერსს“ უთხრეს, რომ მათ მცირე დრო ჰქონდათ დაკავებულთა დიდი ნაკადის მისაღებად. მათ თანამშრომლების საჭირო რაოდენობის არარსებობისა და უსაფრთხოების შესახებ წუხილებიც გამოხატეს.

ფედერალურ პროკურორებს მოეთხოვებათ სისხლის სამართლის საქმეები აღძრან ყველა მათგანის მიმართ, ვისაც საზღვრის არალეგალურად გადაკვეთისას გამოიჭერენ.

წინა, ობამას ადმინისტრაციის პირობებში, უკანონოდ საზღვრის პირველად გადამკვეთი პირების მიმართ გაცილებით მსუბუქი სასჯელი მოქმედებდა. კერძოდ, ასეთ პირებს სამოქალაქო დეპორტაციის პროცედურების გავლა უწევდათ.

ტრამპის ადმინისტრაციის დროს დაკავებულ 1 600 პირს ციხეებში გადაყვანის შემდეგ იქ სავარაუდოდ 120 დღის გატარება მოუწევთ, სანამ მათთვის სხვა საპატიმრო დაწესებულებებსა თუ ოლქების ციხეებში ადგილები გამოინახება.

„ჩვენი ფედერალური ციხეები შექმნილია იმისათვის, რომ იქ განთავსდნენ ყველაზე უარესნი, უარესთა შორის. ისინი არ უნდა იყოს გამოყენებული საიმიგრაციო მიზნებისთვის“, უთხრა „როიტერსს“ ეროვნული საიმიგრაციო ფორუმის დირექტორმა ალი ნოორანიმ.

„ფედერალური ციხეები მძიმე კატეგორიის დამნაშავეებისათვის არის განკუთვნილი. ისინი ფიზიკურად არ არის შექმნილი იმიგრანტებისთვის, რომლებიც სამუშაოს ეძებენ ანდა ძალადობას გამოექცნენ“, დაამატა ნოორანიმ.