მთავრობის დღევანდელ სხდომაზე პრემიერ მინისტრმა გიორგი კვირიკაშვილმა ხორავას ქუჩის მკვლელობის საქმის გამოძიებასათან დაკავშირებით კომენტარი გააკეთა და აღნიშნა, რომ იგი შინაგან საქმეთა სამინისტროს მიერ წარმოებულ გამოძიების შედეგებს დაელოდება.

ამასთან, მან ხაზი გაუსვა, რომ „პოლიტიკურად ანგაჟირებულმა ჯგუფებმა“ ეს მდგომარეობა სათავისოდ გამოიყენეს და „აბსოლუტურად არამართლზომიერ და სიტუაციისადმი არაადეკვატურ მოთხოვნებს აყენებდნენ და აყენებენ“

„ხორავას ქუჩაზე დატრიალებული ტრაგედია ჩვენთვის იქცა სერიოზულ გამოწვევად. ჩვენთვის ადამიანი არის მთავარი ღირებულება. ჩვენ დავკარგეთ ორი ახალგაზრდა და სამწუხაროდ, პირველი ინსტანციის სასამართლოს მიღებულმა გადაწყვეტილებამ ძალიან ბევრი კითხვის ნიშანი გააჩინა, მათ შორის ჩვენშიც. სახელმწიფომ მოახდინა მყისიერი რეაგირება.

„პარლამენტმა მყისიერად მიიღო პოლიტიკური გადაწყვეტილება რომ შექმნილიყო საგამოძიებო კომისია, რაც არის უპრეცედენტო. მინდა ხაზი გავუსვა რომ ეს გადაწყვეტილება იყო მიღებული მანამდე, სანამ რუსთაველზე აქციები იქნებოდა, ვინმემ რომ არ მიიწეროს, იმიტომ რომ მაშინვე გაკეთდა განცხადებები.

„არ მინდა ამაზე ბევრი საუბარი, დავუშვათ, იქ პოლიტიკურად ანგაჟირებულმა ჯგუფებმა როგორ გამოიყენეს ეს სიტუაცია სამწუხაროდ და აბსოლუტურად არამართლზომიერ და სიტუაციისადმი არაადეკვატურ მოთხოვნებს აყენებდნენ და აყენებენ. საზოგადოება ყველაფერს კარგად ხედავს. საზოგადოებამ ძალიან კარგად იცის და ამ საზოგადოებას უცხოვრია იმ სახელმწიფოში, სადაც სახელმწიფო აბსოლუტურად არ უსმენდა ხალხის ხმას“, აღნიშნა კვირიკაშვილმა.