პარლამენტის დროებითმა საგამოძიებო კომისიამ, რომელმაც ხორავას ქუჩაზე მომხდარი მკვლელობის საქმე უნდა შეისწავლოს, დღეს პირველი სხდომა გამართა.

სხდომაზე „პატრიოტთა ალიანსის" წარმომადგენელმა, ადა მარშანიამ კომისიის დატოვება დააანონსა.

„ამ კომისიის შექმნით, განსაკუთრებით მისი პოლიტიკური შემადგენლობის სახით, დავაკანონეთ აბსურდი. საღი აზრი, ზნეობა და მორალი გამოვაცხადეთ სისულელედ. და ძვირფასო პროკურატურავ, იმის მაგივრად, რომ თქვენ დიდი ხნის წინ და ახლაც, ბ-ნი ბოკერია დაიბაროთ და დაკითხოთ, ახლა ნახეთ რა ხდება, რა დღმდე მივედით ჩვენ ყველანი ქვეყნაში - ბ-ნი ბოკერია თქვენ გიბარებთ აქ დასაკითხად პარლამენტში. აქედან გამომდინარე „ქართულ ოცნებას" მინდა მივმართო განსაკუთრებით - თქვენ, აიზილეთ უკვე „ნაციონალური მოძრაობის" დანაშაულებრივ პროცესში, თქვენ უკვე ერთი პოლიტიკური ძალა გახდით იმიტომ, რომ მკვლელებს და სადისტებს აფარებთ ხელს. ამ კომისიის შექმნა არის რომელი ერთი მწვერვალი არ ვიცი - გვირგვინი არის ეს უკვე.

აქედან გამომდინარე, ჩვენი პოლიტიკური ძალა ამ კომისიაში არ დარჩება, ვერ იმუშავებს", განაცხადა კომისიის სხდომაზე ადა მარშანიამ, რომელმაც კომისიის წევრები გააფრთხილა, რომ „ქვეყანაში ძალიან მძიმე პროცესები წავა".