მას შემდეგ, რაც ხორავას ქუჩაზე მოკლული დავით სარალიძის მამამ, ზაზა სარალიძემ თბილისის 51-ე საჯარო სკოლის ადმინისტრაციისაგან მისი შვილის შესახებ პირუთვნელი ინფორმაციის გავრცელება მოითხოვა, მედიასთან კომენტარი გააკეთა აღნიშნული სკოლის დირექტორმა მანანა თურქაძემ, რომელიც გარდაცვლილ დავით სარალიძეს უაღრესად დადებითად ახასიათებს და ამბობს, რომ სოციალურ ქსელებში მასზე გავრცელებული ინფორმაცია იმასთან დაკავშირებით, რომ ის მოძალადე და თანატოლების მჩაგვრელი იყო, წმინდა წყლის ტყუილია.

„დათო იყო არაჩვეულებრივი მოსწავლე, თავაზიანი, კეთილი, ჩართული იყო ყველა ღონისძიებაში, უყვარდა ყველას იმიტომ, რომ იყო დიდი, შესამჩნევი და უყვარდა ყველა ადამიანს. დათო იყო ის ბიჭი, რომელიც ცეკვავდა მუდმივად დერეფანში, რეპავდა და ამბობდა: ‘მე ვარ ბიჭი პოზიტივი’. ასეთი ადამიანი იყო ის. ბოლოს, ჩემს მეხსიერებაში დათო ყველაზე კარგად სასკოლო ოლიმპიადის პერიოდში აღიბეჭდა. ჩვენ ჩავატარეთ სასკოლო ოლიმპიადა სპორტის რამდენიმე სახეობაში და დათო იყო ის ადამიანი, რომელიც აგროვებდა ბავშვებს ამ ოლიმპიადისთვის და დირექციასთან ერთად დიდი სიხარულით გადასცემდა ბავშვებს პრიზებს და თასებს და ა.შ. ვერ ნახავთ ამხელა სკოლაში, ძალიან დიდი სკოლაა ეს, 2 500-ზე მეტი მოსწავლეა და 180-ზე მეტი მასწავლებელი, რომელიც გეტყვით, რომ როდესმე დათოსთან რამე ტიპის კონფლიქტი ჰქონია. ეს არის რა თქმა უნდა ტყუილი“, განაცხადა მანანა თურქაძემ.