განათლებისა და მეცნიერების მინისტრი გომბორზე მომხდარ ტრაგედიას ეხმაურება და აცხადებს, რომ ექსკურსიებთან დაკავშირებული რეგულაციები აშკარად გასამკაცრებელია და განსახილველია ბავშვთა ტრანსპორტირების უსაფრთხოების საკითხები.

„მიუხედავად იმისა, რომ ეს ექსკურსია თვითორგანიზებული იყო, ცალსახად გასამკაცრებელია ექსკურსიებთან დაკავშირებული რეგულაციები. მოსაგვარებელია ესკორტის საკითხები და სპეციალური ნებართვა მძღოლებისთვის, რომლებიც ახორციელებენ ბავშვთა გადაყვანას. როგორც კი დავბრუნდები, შევხვდები შინაგან საქმეთა მინისტრს, გიორგი გახარიას და განვიხილავთ ბავშვთა ტრანსპორტირების უსაფრთხოების საკითხებს“, განაცხადა მიხეილ ჩხენკელმა.

მინისტრმა ავარიის შედეგად გარდაცვლილთა ოჯახებს მიუსამძიმრა და თელავის რეფერალურ საავადმყოფოში გადაყვანილი დაშავებულებები მოინახულა.

გამოძიებით ამ ეტაპზე დადგინდა, რომ თელავის რაიონის სოფელ კობაძეებთან, ქალაქ თელავის მიმართულებით მოძრავი ფორდის მარკის მიკროავტობუსი გზის სავალი ნაწილიდან გადავიდა და ფერდობზე გადავარდა. შემთხვევის შედეგად მიკროავტობუსის 4 მგზავრი გარდაიცვალა, ხოლო 21 დაშავდა.

მიკროავტობუსში თბილისის 175-ე საჯარო სკოლის მე-6 კლასის მოსწავლეები მშობლებთან ერთად იმყოფებოდნენ. გარდაცვლილთაგან ერთი ბავშვია, ხლო 3 ქალი. 

შინაგან საქმეთა სამინისტრომ ვაზიანი-გომბორი-თელავის დამაკავშირებელ საავტომობილო გზაზე მომხდარ ავტოსაგზაო შემთხვევაში მონაწილე მიკროავტობუსის მძღოლი დააკავა. მას 6-დან 10 წლამდე თავისუფლების აღკვეთა ემუქრება.