თბილისში, რუსთაველის გამზირზე, პარლამენტის შენობის წინ აქცია სახელწოდებით, „ნუ მომკლავ" მიმდინარეობს. ამ წუთებში აქციაზე შეკრებილებს სიტყვით გამომსვლელები მიმართავენ.

არასამთავრობო ორგანიზაცია „სამართალდამცველთა რეფორმირების ცენტრის“ ხელმძღვანელის, ზვიად კუპრავას თქმით, ზაზა სარალიძის და მალხაზ მაჩალიკაშვილის მხარდამჭერი აქციის მოთხოვნები უცვლელი რჩება.

„დღემდე სამართლიანობა არ აღდგენილა, სისტემა ისევ მყარად დგას თავის საძირკვლებზე. ის, რომ პასუხისგებაში გუშინ მირზა სუბელიანი მისცეს, ეს არის მოჩვენებითი და არავითარ პასუხისგებაში მირზა სუბელიანი არ მიუციათ. მირზა სუბელიანს იმ მუხლით წაუყენეს მუხლი, რომელიც ჯარიმას ითვალისწინებს და იმდენი აქვს ნაჭამი, რომ ათასი, 10 ათასი და 20 ათასი არავითარ პრობლემას არ წარმოადგენს, გადაიხდის და ისევ გარეთ იქნება", აცხადებს ზვიად კუპრავა, რომლის თქმითაც, აქციები პერმანენტულ ხასიათს მიიღებს.

6 ივნისს, ოპოზიციური პოლიტიკური პარტიების ნაწილის „ლეიბორისტული პარტიის“ ოფისში გამართული ერთ-ერთი შეხვედრისას გადაწყდა, რომ ზაზა სარალიძის და მალხაზ მაჩალიკაშვილის მხარდამჭერი აქციის ორგანიზატორი შალვა ნათელაშვილი და მისი პარტია იქნებოდა.

აქციას „ერთიანი ნაციონალური მოძრაობა“, „ეროვნულ-დემოკრატიული პარტია“, „სახელმწიფო ხალხისათვის“ და „ახალი საქართველო" შეუერთდა.