თბილისში, მთავრობის კანცელარიასთან საპროტესტო აქცია სლოგანით „მთავრობის ადგილი შარდის კონტეინერშია“ მიმდინარეობს. ახალგაზრდებმა კანცელარიის შენობის წინ შარდის კონტეინერები მიიტანეს. როგორც აქციის მონაწილეები აცხადებენ, ისინი ამ ფორმით მარნეულში მომხდარ ფაქტს აპროტესტებენ.

„ახალგაზრდები მოვედით კანცელარიასთან და გავაპროტესტეთ ის ქმედება, რომელიც გუშინ გავრცელდა ონლაინსაშუალებებით. მარნეულში მომხდარი ქმედება ყველა ზღვარს სცილდება. ყველა დაშვებულ ნორმას გადასცდა ეს ხელისუფლება. ეს არის ადამიანის ღირსების შელახვა, დაშინება, შანტაჟი და ჩანს, რომ დღეს უკვე ხელისუფლება პანიკაშია და ამ პანიკის საფუძველზე ძალიან ბევრ შეცდომებს უშვებენ. სწორედ ამ ფაქტს გადაყვება დღევანდელი ხელისუფლება", განუცხადა „რუსთავი 2"-ს აქციის ერთ-ერთმა მონაწილემ.

„თავისუფლად სუნთქვის მეშვიდე წელს, ბიძინა ივანიშვილისა და მარნეულის მერის მიმართ კრიტიკული აზრის დაფიქსირებისთვის, ადამიანი აიძულეს საკუთარი შარდი წაესვა სახეზე. აი ეს კონტეინერი ყველამ კარგად ვიცით რისთვის არის და თუ „ქართული ოცნება" არ შეწყვეტს ადამიანის უფლებების შელახვას, ისინი აუცილებლად აღმოჩნდებიან ამ კონტეინერში", აცხადებს აქციის კიდევ ერთი მონაწილე.

საქმე ეხება ვიდეოს, რომლის გამოც აიყვანეს არსებული ინფორმაციით მარნეულის მერი და რომელშიც დაფიქსირებულია როგორ აიძულებენ ერთ-ერთ მოქალაქეს მოშარდოს და შემდეგ შარდი სახეზე წაისვას.

სტუდია „მონიტორის“ მიერ გამოქვეყნებულ ვიდეომასალაში ჩანს, რომ არაადამიანური და დამამცირებელი მოპყრობის მსხვერპლი ის მამაკაცი გახდა, რომელიც პარლამენტთან ზაზა სარალიძის მხარდამჭერ აქციაზე ბიძინა ივანიშვილს და მარნეულის მერს სიტყვიერ შეურაცხყოფას აყენებდა - ამ პიროვნებაზე ზეწოლა კი პარტია „ქართული ოცნების“ ადგილობრივმა წარმომადგენლებმა და მარნეულის მერმა განახორციელეს.