ჩემი მხრიდან არასწორი იქნება დღეს საუბარი კონკრეტულ მინისტრებზე - ეს არის მამუკა ბახტაძის პრეროგატივა, განუცხადა პარლამენტის თავმჯდომარემ, ირაკლი კობახიძემ ჟურნალისტებს „ქართული ოცნების“ ოფისში, უმრავლესობის გაფართოებული სხდომის დასრულებისა და პრემიერ მინისტრის პოსტზე ფინანსთა მინისტრის მოვალეობის შემსრულებლის, მამუკა ბახტაძის წარდგენის შემდეგ.

„ჯერ ხდება პრემიერ-მინისტრობის კანდიდატის დასახელება და ამის შემდეგ პრემიერ-მინისტრობის კანდიდატი პერსონალურად, ინდივიდუალურად ასახელებს სამთავრობო გუნდს. შესაბამისად, დღეს არ გვქონდა იმის პრეროგატივა, რომ გვემსჯელა სამთავრობო გუნდზე. ჩემი მხრიდან არასწორი იქნება დღეს საუბარი კონკრეტულ მინისტრებზე, ეს არის მამუკა ბახტაძის პრეროგატივა. ის დაასახელებს 14-კაციან შემადგენლობას და ამის შემდეგ იქნება სწორი ჩვენი მხრიდან მსჯელობა კონკრეტულ კანდიდატებზე“, განაცხადა ირაკლი კობახიძემ.

პარლამენტის თავმჯდომარემ მამუკა ბახტაძის შესახებ თქვა, რომ მან ფინანსთა მინისტრის თანამდებობაზე მცირე ხნის განმავლობაში მუშაობისას, "უკვე შეძლო რამდენიმე ისეთი ინიციატივის წარდგენა, რომელმაც გამოიწვია სერიოზული პოზიტიური ძვრები ჩვენი ქვეყნის ეკონომიკურ განვითარებაში“.

„იყო კონკრეტული კრიტერიუმების საფუძველზე მიღებული ეს გადაწყვეტილება. ბატონი მამუკა ბახტაძე არის გამორჩეული როგორც თავისი განათლებით, ასევე, მრავალმხირივი გამოცდილებით. მას აქვს მართვის ძალიან სერიოზული გამოცდილება. ის არის ძალიან სერიოზული ექსპერტი ეკონომიკის მიმართულებით განსაკუთრებით. კიდევ ერთხელ გავიმეორებ, მას აქვს ძალიან ღრმა განათლება, მრავალმხრივი გამოცდილება, უნარი იმის, რომ მართოს ქვეყანა და მე დარწმუნებული ვარ, რომ ის ძალიან დიდი წარმატებით უზრუნველყოფს ჩვენი ქვეყნის წინსვლას და განვითარებას.

ბატონი მამუკა ბახტაძე მთელი ამ დროის განმავლობაში გამოდიოდა ძალიან მნიშვნელოვანი ინიციატივებით და ჩვენ უკვე ვხედავთ ამ ინიციატივების შედეგებს და მე დარწმუნებული ვარ, როდესაც ბატონი მამუკა წარსდგება პარლამენტის წინაშე სამთავრობო პროგრამით, ამ პროგრამაში იქნება ასახული ახალი ინიციატივები, რომელიც დააჩქარებს ჩვენს ქვეყანაში ეკონომიკურ განვითარებას და დააჩქარებს, ზოგადად, ჩვენი ქვეყნის წინსვლას”, განაცხადა ირაკლი კობახიძემ.