„დემოკრატიული მოძრაობის“ თავმჯდომარემ, ნინო ბურჯანაძემ პრემიერ მინისტრის კანდიდატურად მამუკა ბახტაძის წარდგენის შესახებ კომენტარის გაკეთებისას თქვა, რომ „სასაცილო მდგომარეობაში ვართ“, რადგან ივანიშვილი „ვერავის ვერ ხედავს საკუთარი ოჯახის ახლობლების და ფავორიტების გარდა“.

ბურჯანაძის თქმით, ეს არა უმრავლესობის, არამედ ბიძინა ივანიშვილის მიერ მიღებული გადაწყვეტილებაა, რაც „სასაცილოა, სატირალი რომ არ იყოს“.

„სამწუხაროდ, სასაცილო მდგომარეობაში ვართ. ცოტა უხერხულია, როდესაც ადამიანები, რომლებიც სერიოზულად გვგონია გველაპარაკებიან, გვეუბნებიან, რომ სერიოზული და გამოცდილი კანდიდატია პრემიერ მინისტრობის. გავიხსენოთ, რომ ეს არის ქვეყანა, რომელსაც სჭირდება ტერიტორიული კონფლიქტების მოგვარება, რომელსაც საკმაოდ რთული ურთიერთობა აქვს მეზობელთან, უმძიმესი სოციალურ ეკონომიკური მდგომარეობა აქვს.

ეს ნიშნავს, რომ ივანიშვილი არა თუ ვერ ფლობს ინფორმაციას, არავინ არა ჰყავს კადრები, ვერავის ვერ ხედავს საკუთარი ოჯახის ახლობლების და ფავორიტების გარდა. ეს ძალიან მალე დაანგრევს ამ ხელისუფლებას”, განაცხადა ნინო ბურჯანაძემ, როგორც ამას საზოგადოებრივი მაუწყებელი იტყობინება.